„დასაქმება მათი ვალია, დასაქმების მოთხოვნა კი ჩვენი უფლება", ამ სლოგანით ქუთაისის აკაკი წერეთლის სახელმწიფო უნივერსიტეტში 200-მდე სტუდენტი საპროტესტო აქციას მართავს. აქციის მონაწილეების მთავარი მოთხოვნა ხელისუფლების მიერ საზაფხულო სამუშაოების კვლავ აღდგენაა.
„საქართველოს სხვადასხვა ქალაქებში სტუდენტების საინიციატივო ჯგუფები ვაპროტესტებთ ხელისუფლების მიერ სტუდენტთა დასაქმების პროგრამის გაუქმებას. აღნიშნული პროგრამით ჩვენ საშუალება გვქონდა ზაფხულში გამოგვემუშავებინა ის მიზერული თანხა რომლითაც დასვენებას მოვახერხებდით. თუმცა ახალმა ხელისუფლებამ ახალგაზრდების ინტერესები არ გაითვალისწინა, რაც სამწუხაროა", - განაცხადა აქციის მონაწილე შალვა ჩიხლაძემ.
ცნობისთვის სტუდენტური საზაფხულო პროგრამა გასულ წელს ნაციონალური მოძრაობის ხელისუფლებამ აამოქმედა და ის მიზნად ისახავდა სტუდენტების ერთ თვიან დასაქმებას, რაშიც სტუდენტებს 400 ლარის ანაზღაურება გადაუხადეს.
