3-10 ივნისის ჩათვლით საქართველოში ნატოს კვირეული გაიმართება. ნატოს კვირეულს 11:00 საათზე სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილი და ნატოს გენერალური მდივნის სპეციალური წარმომადგენელი სამხრეთ კავკასიაში და ცენტრალურ აზიაში ჯეიმს აპატურაი ოფიციალურად გახსნიან.
კვირეულის ფარგლებში საქართველოს ნატოს შტაბ-ბინიდან მაღალი დონის სტუმრები ეწვევიან.
კვირეულის ფარგლებში დაგეგმილია სხვადასხვა ღონისძიება: თბილისში 3 ივნისს გაიმართება საერთაშორისო სემინარი „საზოგადოების ინფორმირება ნატოში ინტეგრაციის პროცესის შესახებ" ნატოს ასპირანტი ქვეყნების მონაწილეობით.
ასევე დაგეგმილია შეხვედრები სტუდენტებთან, არასამთავრობო ორგანზიაციების წარმომადგენლებთან, სპორტული ღონისძიებები, გამოფენები, სხვადასხვა კონკურსები და დებატები თბილისში და რეგიონებში.
შეგახსენებთ, რომ ნატოს კვირეული ნატოსა და ევროკავშირის შესახებ საინფორმაციო ცენტრის ორგანიზებით და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის მხარდაჭერით იმართება.
