მიმდინარე წელს სეპარატისტული აფხაზეთის პარლამენტმა კანონი უნდა მიიღოს, რომლის მიხედვითაც, რუსეთის მოქალაქეებს ოკუპირებულ აფხაზეთში საცხოვრებლის ყიდვა "კანონიერად" შეეძლებათ. აფხაზური ოპოზიციური ინგერნეტგამოცემის ინფორმაციით, კანონში ამ ცვლილებების მიღების შემდეგ, უძრავ ქონებაზე ფასი ორჯერ მაინც მოიმატებს. აღსანიშნავია ისიც, რომ აფხაზეთში არსებული ოპოზიცია და ექსპერტები ამ ცვლილებებისადმი ნეგატიურადაა განწყობილი.
მათი ინფორმაციით, რუსეთის მოქალაქეებისთვის აფხაზეთში უძრავი ქონების მიყიდვის უფლების მინიჭება აფხაზ სეპარატისტთა ლიდერ სერგეი ბაღაფშს სურს. მოსკოვში ვიზიტისას თავად ბაღაფშმა განაცხადა, რომ "მზადდება კანონმდებლობა, რომლის მიხედვითაც, აფხაზეთში უძრავი ქონების შეძენა რუსეთის მოქალაქეებს შეეძლებათ".
სეპარატისტულ აფხაზეთში ამჟამად მოქმედი კანონმდებლობით, აფხაზეთში უძრავი ქონების შეძენა მხოლოდ აფხაზეთის ე. წ. მოქალაქეობის მქონე პირებს შეუძლიათ, რუსეთის მოქალაქეებს კი _ არა. თუმცა ეს წინააღმდეგობა ადვილად გადასალახავია მოქალაქეობის მიუღებლადაც. შეიძლება უბრალოდ, შეძენილი უძრავი ქონება აფხაზეთის მოქალაქეზე გაფორმდეს, ან შეიქმნას აფხაზეთში იურიდიული პირი, რომელზედაც ფორმდება საცხოვრებელი ფართი. თუმცა ამ შემთხვევებში უძრავი ქონების დაკარგვის საფრთხე არსებობს.
"კანონში ცვლილებების შეტანა ძალიან ბევრ საკითხს მოხსნის", თუმცა "ამას ჯერ კიდევ მხარი უნდა დუჭირონ აფხაზმა დეპუტატებმა და ამასთან დაკავშირებით პრობლემების შექმნას არ ველი", _ აცხადებს ბაღაფში.
აფხაზეთის ე. წ. პარლამენტის სპიკერი "გაზეტა.რუ"-სთან საუბარში აცხადებს, რომ "თამაშის ახალი წესების დამკვიდრება" მიმდინარე წლის განმავლობაში მოხდება.
"სოხუმში ადრე ბევრი თავისუფალი საცხოვრებელი სახლი იყო. თუმცა ამდენი აფხაზი არ აღმოჩნდა. ამიტომაც ეს უძრავი ქონება მოძმე რუსეთის მოქალაქეებმა დაიკავეს", _ განაცხადა აშუბამ. მისი თქმით, ამჟამად აფხაზეთის პარლამენტში მიდის საკითხის განხილვა, რომელიც აფხაზეთში საცხოვრებელი ფართის უცხოელ მოქალაქეებზე გაყიდვას ითვალისწინებს.
"ვკამათობთ და ვმსჯელობთ, ვის შეიძლება მივყიდოთ საცხოვრებელი ფართი და ვის არა. ვინც ჩვენი წინააღმდეგია მას, რა თქმა უნდა ,არაფერსაც არ მივყიდით", _ განაცხადა აშუბამ.
აფხაზი პოლიტოლოგი, ოპოზიციური გაზეთის "ჩეგემსკაია პრავდას" რედაქტორი ინალ ხაშიგი კანონში ამგვარი ცვლუბების შეტანას არ ეთანხმება და მიიჩნევს, რომ პირველი, რასაც ეს შესწორებები გამოიწვევს, უძრავ ქონებაზე ფასის მკვეთრი მატება იქნება.
ამჟამად აფხაზურ ინტერნეტსაიტებზე, რომლებზეც აფხაზეთში არსებული საცხოვრებელი სახლები იყიდება ფასები 500 ათასი რუსული რუბლიდან იწყება. თუმცა სოხუმის გარეთ ბინის ყიდვა 100 ათას რუსულ რუბლადაცაა შესაძლებელი. ამავე დროს, არის სახლები, რომელთა ღირებულება რამდენიმე მილიონი რუსული რუბლია. ინალ ხაშიგს ასევე ეთანხმება უძრავი ქონების სააგენტოს "სტრანა მიმოზის" გენერალური დირექტორიც მარია პარამოვაც.
"ფასები მოიმატებს, სულ მცირე ორჯერ მაინც და არა მხოლოდ იმიტომ, რომ კანონი იქნება მიღებული, არამედ იმიტომაც, რომ იმ დროისათვის აეროპორტიც გაიხსნება", _ აცხადებს პარამოვა და დასძენს, რომ თუ ამჟამად სოხუმის ფარგლებს გარეთ სახლები დიდი მოთხოვნილებით არ სარგებლობს, მას შემდგეგ, რაც აეროპორტი დაიწყებს ფუნქციონირებას, მათზე მოთხოვნა გაიზრდება.
"მაგალითად, ოჩამჩირიდან სოხუმის აეროპორტამდე უფრო ადრე მიხვალ, ვიდრე გაგრიდან", _ აცხადებს პარამოვა.
ხაშიგი აცხადებს, რომ "პრობლემა აფხაზური კომპლექსის მქონე 17 %-შია".
"ომამდე სწორედ ამდენი აფხაზი ეროვნების ადამიანი ცხოვრობდა აფხაზეთში. ამჟამად აფხაზეთში დაახლოებით 200 ათასი აფხაზი ცხოვრობს, ამიტომაც მათ ეშინიათ, რომ რუსები აქ საცხოვრებლად დაიწყებენ გადმოსვლას. უარყოფითი ეფექტის შეგრძნება კი ალბათ მხოლოდ 10 წლის შემდეგ შეგვეძლება, როდესაც აქ საცხოვრებლად გადმოსული რუსები ფეხს მოიდგამენ და შესაძლოა სახელმწიფოებრივი მოწყობის საკითხიც დააყენონ და დამოუკიდებლობაზე უარის თქმა მოინდომონ", _ აცხადებს ხაშიგი.
თუმცა ნუგზარ აშუბა აცხადებს, რომ მას მოვლენების ამგვარად შემოტრიალებისა არ სჯერა.
"არც ერთი რუსი ადამიანი არასოდეს არ იტყვის _ აფხაზეთი ეს მისი მიწაა. მიწა კი აქ ყველას ეყოფა, აფხაზებსაც და რუსებსაც", _ აცხადებს აშუბა.
აფხაზეთში მიწის გაყიდვის წინააღმდეგ ასევე გამოდის აფხაზური ოპოზიცია.
"თუმცა ხელისუფლებამ ამ კანონის მიღება და მოსწრება მანამ გადაწყვიტა, ვიდრე ოპოზიცია ნოკაუტშია. ამავე დროს ამ გადაწყვეტილების გამო შესაძლოა ცალკეული ჩინოვნიკები გამდიდრდნენ, თუმცა არა მგონია, ამის გამო აფხაზეთის ბიუჯეტი ძალიან შეივსოს. ამ გადაწყვეტილებას ცალკეული დეველოპერიული სტრუქტურები ლობირებენ, რომელთა უკანაც ძლიერი ადამიანები დგანან", _ აცხადებს ხაშიგი.
ხაშიგი ასევე აცხადებს, რომ ბაღაფშის ამგვარი გადაწყვეტილებები განპირობებული მხოლოდ და მხოლოდ იმით, რომ "იგი მადლობას უხდის რუსეთს აფხაზეთის დამოუკიდებლობის აღიარებისთვის".
"ასევე "მადლიერებად" უნდა განვიხილოთ მათი ყველა დანარჩენი გადადგმული ნაბიჯი _ კონტრაქტი ნავთობის მოპოვებაზე, სამხედრო ბაზების განთავსება და აფხაზური რკინიგზის რუსეთის რკინიგზისათვის მიცემა", _ აცხადებს ხაშიგი.
ამავე დროს ხაშიგი ხაზგასმით აღნიშნავს, რომ "აფხაზური რკინიგზა მართლაც სავალალო მდგომარეობაშია, მაგრამ მისი ასე გადაცემა, აფხაზური ინტერესების საზიანოდ მაინც გაუმართლებელი ნაბიჯია".
