საქართველოს კულტურის სამინისტრომ, თბილისის ზ.ფალიაშვილის სახელობის ოპერისა და ბალეტის სახელმწიფო თეატრის მმართველის თანამდებობაზე არსებული კანდიდატების მიერ
წარმოდგენილი თბილისის საოპერო თეატრის განვითარების კონცეფციებს შორის ყველაზე მისაღებად გიორგი ჟორდანიას პროექტი მიიჩნია და სამინისტროს კომპეტენციის ფარგლებში, მაესტროს მრავალმხრივი გამოცდილების გათვალისწინებით, მიიღო გადაწყვეტილება გიორგი ჟორდანიას თბილისის ზ.ფალიაშვილის სახელობის ოპერისა და ბალეტის სახელმწიფო თეატრის მმართველის თანამდებობაზე დანიშვნის შესახებ.
გიორგი ჟორდანია:
თბილისის სახელმწიფო კონსერვატორიის დასრულების შემდეგ გიორგი ჟორდანიამ
სწავლა განაგრძო აშშ-ში, ტენესის უნივერსიტეტის ასპირანტურაში, სადაც გაიარა საოპერო-სიმფონიური დირიჟორობისა და საოპერო რეჟისურის სრული კურსი (1989-91). პარალელურად გახდა ჩატანუგის სიმფონიურ და საოპერო ასოციაციის მთავარი დირიჟორის ვახტანგ ჟორდანიას ასისტენტი და აქტიურად მონაწილეობდა სიმფონიური კონცერტებისა თუ საოპერო სპექტაკლების ("აიდა", "რიგოლეტო", "ტოსკა", "სევილიელი დალაქი", "ბოჰემა") დადგმის პროცესში.
მისი პროფესიული დებიუტი სიმფონიური კონცერტით ჩატანუგის ოპერისა და სიმფონიური ასოციაციის ორკესტრთან 1990 წლის 4 ივლისს აშშ-ში, ქ. ჩატანუგაში შედგა (30 ათასი მაყურებლის წინაშე).
1991 წელს დირიჟორი ბრუნდება საქართველოში და 19 წლის განმავლობაში მუშაობს თბილისის ოპერისა და ბალეტის თეატრში, სადაც დირიჟორობდა ისეთ სპექტაკლებს როგორიცაა: "რიგოლეტო", "ტოსკა", "მადამ ბატერფლაი", "დონ ჯოვანი", " პიკის ქალი", "მედეა", "სოფლის ღირსება", "დაუპატიჟებელი სტუმრები", "მაკნატუნა" და სხვა.
მაესტრო გიორგი ჟორდანიას სადირიჟორო რეპერტუარშია როგორც საოპერო, ისე საბალეტო ნაწარმოებები, მათ შორის: ვერდის - აიდა (ჩატანუგის ოპერა, აშშ; ხარკოვის ოპერა, უკრაინა), რიგოლეტო (ჩატანუგის ოპერა, აშშ;), ტრავიატა (ხარკოვის ოპერა, უკრაინა), ბალ მასკარადი (ხარკოვის ოპერა, უკრაინა), დონ კარლოსი (ხარკოვის ოპერა, უკრაინა); პუჩინის - ტოსკა (ჩატანუგის ოპერა, აშშ;), ბოჰემა (ჩატანუგის ოპერა, აშშ); როსინის - სეველიელი დალაქი (ჩატანუგის ოპერა, აშშ); რახმანინოვის - ალეკო (ხარკოვის ოპერა, უკრაინა); სენ-სანსის - სამსონი და დალილა (ხარკოვის ოპერა, უკრაინა); ბიზეს - კარმენი (ხარკოვის ოპერა, უკრაინა); ჩაიკოვსკის - პიკის ქალი (თბილისის ოპერა), ევგენი ონეგინი (ხარკოვის ოპერა, უკრაინა); ბიძინა კვერნაძის - მედეა (თბილისის ოპერა); ლეონკავალოს - ჯამბაზები (თბილისის ოპერა; ხარკოვის ოპერა, უკრაინა); და ბალეტები: ჩაიკოვსკის - მაკნატუნა (თბილისის ოპერა) და ფერდინანდ ჰეროლდის - ამაო სიფრთხილე (თბილისის ოპერა)
სხვადასხვა წლებში გიორგი ჟორდანია ხელმძღვანელობდა რუსეთის ფედერალურ ორკესტრს -მთავარი მოწვეული დირიჟორის რანგში, 1991-92 ხარკოვის სიმფონიური ორკესტრსა და შემდგომ ოპერისა და ბალეტის თეატრს, სადაც მაესტრომ 10 წელი გაატარა, ასევე, აშშ-ში, დენვერის კამერულ ორკესტრს (მთავარი მოწვეული დირიჟორი) და ა.შ.
1999 - 2004 წლებში გიორგი ჟორდანია იყო საქართველოს სახელმწიფო კამერული ორკესტრის მთავარი დირიჟორი და ორკესტრთან ერთად კონცერტებით მოიარა პრაქტიკულად მთელი ევროპა (გერმანია, საფრანგეთი, ნიდერლანდები, ბელგია, შვეიცარია, ესპანეთი, იტალია, თურქეთი, ისრაელი)
2000 წელს გიორგი ჟორდანია სახელმწიფო კამერული ორკესტრთან ერთად მონაწილეობას იღებს ცნობილ მევიოლინე ლიანა ისაკაძის თაოსნობით ჩატარებულ საკონცერტო მოგზაურობაში "პილიგრიმობა ევროპიდან იერუსალიმში", რომელიც საქართველოდან დაიწყო და ევროპის გავლით იერუსალიმში დასრულდა.
ამავე წელს ლიანა ისაკაძესთან ერთად დააფუძნა "ბორჯომის კამერული ფესტივალი" და ოთხი წლის განმავლობაში მისი მთავარი დირიჟორი იყო.
2001 წელს იგი ხდება უკრაინის საერთაშორისო სადირიჟორო კონკურსის "ახალი მილენიუმის" გამარჯვებული - I პრემიისა და გრან პრის მფლობელი; 2001 წელსვე მას ენიჭება საქართველოს სახელმწიფო პრემია.
2005 წელს ქ; ჩატანუგაში მაესტროს იწვევენ ვახტანგ ჟორდანიას სახელობის საერთაშორისო სადირიჟორო კონკურსის ჟიური თავმჯდომარედ.
2008 წლიდან გიორგი ჟორდანია თბილისში დაარსებული "ხელოვნების სააღდგომო ფესტივალის" დირექტორი და სამხატვრო ხელმძღვანელია.