საქართველო სეპარატისტების მოთხოვნის დაკმაყოფილებას ჟენევის საერთაშორისო მოლაპარაკებათა ფორმატის შეცვლასთან დაკავშირებით - არ აპირებს. განცხადებას ამის შესახებ საქართველოს საგარეო საქმეთა სამინისტრო ავრცელებს.
"სოხუმისა და ცხინვალის საოკუპაციო რეჟიმების, ასევე მოსკოვის წარმომადგენლებმა ერთობლივი ძალისხმევა გასწიეს ჟენევის მოლაპარაკებათა ფორმატის შეცვლის მიზნით რომელიც ითვალისწინებდა მონაწილეთათვის დელეგაციების სტატუსის მინიჭებას და მეორე სამუშაო ჯგუფის ჰუმანიტარულ საკითხთა დღის წესრიგის დაქვემდებარებას სტატუსზე ორიენტირებულ პოლიტიკურ დისკუსიაზე", _ იუწყება საქართველოს საგარეო უწყება და აღნიშმნავს, რომ "საქართველოს დელეგაციის წევრებმა და თანათავმჯდომარეებმა ხაზგასმით აღნიშნეს ჟენევის მოლაპარაკებათა შეთანხმებული ფორმატის უცვლელად დატოვების გადამწყვეტი მნიშვნელობა".
ამასთან ერთად, მათ ასევე მიუთითეს, რომ ჰუმანიტარული და ადამიანის უფლებათა საკითხები შესაძლებელია და განხილულ უნდა იქნას იმ პროცესის ფარგლებში, რომელიც განცალკევებულია საბოლოო პოლიტიკური შეთანხმებისგან.
