27-30 მარტს იტალიაში ქართული ბიზნესდელეგაციის ვიზიტი იგეგმება. ვიზიტის ფარგლებში, 28 მარტს ქალაქ ვინჩენცაში და 29 მარტს ქალაქ რომში დაგეგმილია "Georgia: Business Oportunities for the Italian Companies".
სავაჭრო-სამრეწველო პალატის ინფორმაციით, ღონისძიება დაგეგმილია ორ ნაწილად: ბიზნესფორუმი და ორმხრივი შეხვედრები. ბიზნესფორუმზე პრეზენტაციებით წარდგებიან ქართული და იტალიური მხარის წარმომადგენლები.
ქართული მხრიდან მონაწილეობას იღებენ სავაჭრო-სამრეწველო პალატის პრეზიდენტი კახა ბაინდურაშვილი, საქართველოს ელჩი იტალიის რესპუბლიკაში კონსტანტინე გაბაშვილი, ქ. თბილისის მერი გიგი უგულავა.
იტალიის მხრიდან თანაორგანიზატორები არიან საქართველოს სავაჭრო-სამრეწველო პალატის წარმომადგენლობა იტალიის რესპუბლიკაში, ვინჩენცას დამსაქმებელთა და ბიზნესმენთა ასოციაცია და რომის დამსაქმებელთა და ბიზნესმენთა ასოციაცია. ეს ასოციაციები აერთიანებენ ათასობით დიდ და ასევე მცირე და საშუალო ზომის ბიზნესკომპანიას, რომელთა წარმომადგენლებიც მიწვეულნი იქნებიან აღნიშნულ ღონისძიებებზე. ღონისძიების ფარგლებში იგეგმება ქართულ-იტალიური სავაჭრო პალატის დაფუძნება.