ბანკში ჩადებული ლიცენზიის გაუქმების შემთხვევაში, ყადაღის, გირაოს ან სხვა დატვირთვის გაუქმებასთან დაკავშირებით კანონში დაზუსტება ხდება.
"ლიცენზიებისა და ნებართვების" შესახებ კანონში ცვლილებების თანახმად, ჩაიწერება, რომ ნებისმიერი პირი, მათ შორის საკრედიტო დაწესებულება ან სადაზღვევო ორგანიზაცია, რომელთა საკუთრებაშიც, სარგებლობაში ან მართვაში გადავა დაგირავებული ან სხვაგვრად დატვირთული ბუნებრივი რესურსებით სარგებლობასთან დაკავშირებული ლიცენზია, ვალდებულია, შეასრულოს სალიცენზიო პირობები, კონკრეტული ობიექტით სარგებლობისთვის დადგენილი მოთხოვნები და ლიცენზიის გამცემის მიერ დადგენილი სხვა მოთხოვნები.
ლიცენზიის გამცემი უფლებამოსილი იქნება დადგენილი წესით გააუქმოს დაყადაღებული, დაგირავებული ან სხვაგვარად დატვირთული ბუნებრივი რესურსებით სარგებლობასთან დაკავშირებული ლიცენზია, თუ არსებობს ლიცენზიის გაუქმების სფუძვლები. ლიცენზიის გაუქმების შემთხვევაში ასევე უქმდება შესაბამისი ყადაღა, გირაო ან სხვა დატვირთვა.
როგორც დღეს გარემოს დაცვისა და ბუნებრივი რესურსების კომიტეტის სხდომაზე ცვლილებების პირველი მოსმენით განიხილვისას ენერგეტიკისა და ბუნებრივი რესურსების მინისტრის მოადგილემ ნინო ენუქიძემ განმარტა, შესაბამისი რეგულაცია სხვადასხვა კანონმდებლობით ისედაც არსებობს, თუმცა კონკრეტული მუხლის სახით არ იყო ჩამოყალიბებული.
მისი თქმით, აღნიშნულთან დაკავშირებით ბანკებს პრობლემები ექმნებოდა, ახლა კი, ცვლილებების მიღების შემდეგ, მათ საშუალება მიცემათ ლიცენზიის გირაოში ჩადების რისკები განსაზღვრონ.