მიკროსაფინანსო ორგანიზაციამ "ბონაკო" თამასუქების ემისია განახორციელა. ფასიანი ქაღალდი მის მფლობელს წლიური 20%-იანი სარგებლის მიღების საშუალებას აძლევს.
თამასუქები დენომინირებულია ლარში და აშშ დოლარში. მინიმალური თანხა 1000 ერთეულია, ხოლო მაქსიმალური - 100 ათასი ერთეული.
ფასიანი ქაღალდის ვადიანობა 1 წელია, თუმცა სათამასუქო თანხის გამოთხოვა შესაძლებელია ვადის ამოწურვამდეც. ამ შემთხვევაში თამასუქის მფლობელს არ ეკისრება პირგასამტეხლო, ან ნაკლები სარგებელი, ვინაიდან სარგებლის დარიხვა ხორციელდება ყოველდღიური დარიცხვის მეთოდით. დარიცხული სარგებლის გატანა შესაძლებელია როგორც ყოველთვიურად, ასევე პერიოდის ბოლოს.
"მოხარული ვართ ბაზარზე წარმოვადგინოთ ფულის ინვესტირების საიმედო და ეფექტიანი ინსტრუმენტი, რომელიც გამყარებულია კომპანიის უკვე შეძენილი გამოცდილებითა და ასევე მისი კარგი ფინანსური მდგომარეობით. თამასუქის მფლობელი იქნება გარანტირებული მიიღოს ერთ-ერთი უმაღლესი სარგებელი ბაზარზე. კლიენტის კმაყოფილების მიზნით, კომპანიამ თამასუქის პირობები ისე შექმნა, რომ მომხმარებელი მუდმივად იქნება გარანტირებული დარიცხული სარგებლის გატანის ყოველდღიური მეთოდით, ანუ ვადის დარღვევის შემთხვევაშიც მომხმარებელი არ დაზარალდება", - განაცხადა „ბონაკოს" დირექტორმა ლაშა ამაღლობელმა.
აღსანიშნავია, რომ "ბონაკო" მიკროსაფინანსო ორგანიზაციების ბაზარზე 2010 წლიდან ოპერირებს და ამ დროისთვის წარმოდგენილია 3 ფილიალით თბილისში. კომპანიის ძირითადი საქმიანობაა ფიზიკური პირების მომსახურება, ისეთი პროდუქტებით, როგორიცაა: სწრაფი მიკროსესხები, იპოთეკური სესხები, ფულადი გზავნილები, კომუნალური გადარიცხვები, სავალუტო ოპერაციები. კომპანია კლიენტებს ასევე სთავაზობს ავია ბილეთებით მომსახურებასაც. ყველა მომსახურებით სარგებლობა შესაძლებელია ნებისმიერ ფილიალში 24 საათის განმავლობაში, კვირის ნებისმიერ დღეს.