სალარო აპარატის ჩეკი ლატარიის ბილეთის ფუნქციას იძენს და მის მფლობელს სხვადასხვა პრიზის მოგება შეეძლება, - ამის შესახებ "ჯი-ეიჩ-ენს" მთავრობის საპარლამენტო მდივანმა გია ხუროშვილმა განუცხადა. მისი თქმით, ცვლილება „ლატარიების, აზარტული და მომგებიანი თამაშობების მოწყობის შესახებ" საქართველოს კანონში შედის, რომლის მიხედვითაც, ჩეკის მფლობელი გათამაშების მონაწილე ხდება, რომელსაც სამომავლოდ შემოსავლების სამსახური ჩაატარებს.
ფულადი პრემიის მოცულობა და გათამაშების სისტემატურობა ამ დროისათვის არ კონკრეტდება, რადგანაც როგორც ხუროშვილი ამბობს, აღნიშნულს სამომავლოდ მთავრობა განსაზღვრავს.
„ჩვენ პირველ ეტაპზე ვადგენთ სამართლებრივ საფუძვლებს იმისა, რომ შემოსავლების სამსახურს შესაბამისი ლატარეის ორგანიზება შეეძლოს. უკვე გატარებული საგადასახადო რეფორმების შედეგად აბსოლიტურადაა შესაძლებელი და ნებისმიერ მაღაზიაში გამყიდველი კლიენტს ჩეკს აუცილებლად აძლევს. გათამაშების დაწყება კი იქნება წახალისება ამ პროცესის, რათა ერთი მხრივ, ჩეკი გამოიწეროს და მეორე მხრივ, ნებისმიერ შემთხვევაში ჩეკით მყიდველი გათამაშებაში მონაწილეობას შეძლებს", - განუცხადა „ჯი-ეიჩ-ენს" გია ხუროშვილმა.
აღნიშნული ინიციატივით, შემოსავლების სამსახური გაყიდული საქონლის აღრიცხვის კონტროლს განახორციელებს, რადგანაც კლიენტს უკვე ინტერესიც უჩნდება გამყიდველისაგან ჩეკი აუცილებლად მიიღოს.