ყირგიზეთის სამთავრობო დელეგაცია საქართველოში 24 თებერვლის ჩათვლით დარჩება და საქართველოს მთავრობის წარმომადგენლებთან გამართავს შეხვედრებს.
ფინანსთა მინისტრი დიმიტრი გვინდაძე, დღეს ყირგიზეთის სამთავრობო დელეგაციას შეხვდა, რომელსაც ყირგიზეთის ეკონომიკის მინისტრის პირველი მოადგილე ადილბეგ კასიმალიევი ხელმძღვანელობდა. დელეგაციის შემადგენლობაში არიან ყირგიზეთის ეკონომიკის სამინისტროსა და ცენტრალური ბანკის წამყვანი დეპარტამენტების ხელმძღვანელები.
დიმიტრი გვინდაძემ სტუმრებს გააცნო საქართველოში განხორციელებული რეფორმები, რომლებიც გატარდა საბიუჯეტო-ფისკალური პოლიტიკის, საგადასახადო და საბაჟო ადმინისტრირების კუთხით. მინისტრმა ისაუბრა საქართველოში არსებულ მაკრო-ფისკალური სტაბილურობისა და დინამიური ეკონომიკური ზრდის თაობაზე, ქვეყნანაში ჩატარებულ სტრუქტურულ რეფორმებზე, სახელმწიფო ვალის მართვის კუთხით დანერგილ მოდელზე, კერძო სექტორის ხელშეწყობისთვის მთავრობის მხრიდან გადადგმულ ნაბიჯებზე. საუბარი ასევე შეეხო ორმხრივი თანამშრომლობის საკითხებს. საქართველოში ყირგიზეთის დელეგაციის ჩამოსვლის ძირითადი მიზანია - გაეცნოს საქართველოში ბოლო წლების განმავლობაში განხორციელებულ რეფორმებს.
„ინტერესი ჩვენთან განხორციელებული რეფორმებისადმი გამოირჩევა საკმაოდ მზარდი დინამიკით. ჩვენ უფრო და უფრო დიდი სიხშირით ვიღებთ დელეგაციებს სხვადასხვა ქვეყნიდან, როგორც პოსტსაბჭოთა სივრციდან, ასევე ცენტრალური და აღმოსავლეთ ევროპიდან, რაც იმ რეფორების აღიარებაა, რომელიც განხორციელდა ჩვენს ქვეყანაში," - განაცხადა ფინანსთა მინისტრმა დიმიტრი გვინდაძემ.
ფინანსთა სამინისტროს ინფორმაციით, ეს ყირგიზეთის სამთავრობო დელეგაციის მეორე ვიზიტია საქართველოში, რომელსაც მასპინძლობს თბილისის სახელმწიფო უნივერსიტეტის ეკონომიკის საერთაშორისო სკოლა (ISET). პირველად სამთავრობო დელეგაციამ ქ. თბილისში შეხვედრები გამართა გასული წლის ოქტომბერში.
24 თებერვლის ჩათვლით სამუშაო ვიზიტის ფარგლებში ყირგიზეთის სამთავრობო დელეგაციის წევრები შეხვედრებს გამართავენ სხვადასხვა სახელმწიფო უწყებებში. შეხვედრა გაიმართება ფინანსთა სამინისტროს შემოსავლების სამსახურში. დელეგაციის წევრები ასევე მოინახულებენ შემოსავლების სამსახურის სერვის-ცენტრს.
