ეროვნული ბანკის პრეზიდენტის გიორგი ქადაგიძის განცხადებით, "ქართუ ბანკის" წინააღმდეგ აღძრული სისხლის სამართლის საქმე მთლიანად სამართალდამცავების კომპეტენციაა და ეროვნული ბანკი მასში ჩართული ვერ იქნება. ეს განცხადება ქადაგიძემ პარლამენტის საფინანსო-საბიუჯეტო კომიტეტის სხდომაზე გააკეთა.
"იმისათვის, რომ ჩვენს საზოგადოებაში არ გაჩნდეს ეჭვი, პანიკა, რაც ბანკისთვის სენსიტიურია, მზად აღმოვჩნდით, "ქართუ ბანკისათვის" ანალოგიური თანხა შეგვეთავაზებინა. ამ შეთავაზების ერთადერთი იდეა ის იყო, რომ აღნიშნული საკითხი პოლიტიზებული არ ყოფილიყო", -- აღნიშნა გიორგი ქადაგიძემ.
რაც შეეხება უკანონო შემოსავლების ლეგალიზაციას, რაზეც სისხლის სამართლის საქმეა აღძრული, ქადაგიძის თქმით, ამასთან დაკავშირებული ინფორმაცია საჯარო მას შემდეგ გახდება, რაც გამოძიება მუშაობას დაასრულებს.
"გამოძიების შედეგებს დაველოდებით. შესაბამისად, ამის შემდეგ შემეძლება კომენტარი გავაკეთო იმაზე, თუ რა ხდება. გამოძიების პროცესში ჩართულები ვერ ვიქნებით. ეროვნული ბანკი ამ პროცესში არ მონაწილეობს, რადგან ეს საქმე სისხლის სამართლის საქმეა", - აღნიშნა ეროვნული ბანკის პრეზიდენტმა.
