საქართველოს ორ, რუსეთის მიერ ოკუპირებულ ნაწილში - აფხაზეთსა და ცხინვალის რეგიონში აფხაზური და ოსური ენის წინაშე მდგარ საფრთხეებზე ალაპარაკდნენ. სეპარატისტული რეგიონების მედიაში აქტიურად განიხილება მდგომარეობა, რომელშიც აფხაზური და ოსური ენები იმყოფებიან. ორივე რეგიონში აცხადებენ, რომ მდგომარეობა ამ მიმართულებით საგანგაშოა.
სეპარატისტულ სამხრეთ ოსეთში, რუსული ენისათვის სახელმწიფოებრივი სტატუსის მინიჭების წინააღმდეგ გამოდიან. ოსური მედიის ინფორმაციით, ე.წ. სამხრეთ ოსეთის ინტელიგენციის ნაწილი წინააღმდეგია, 13 ნოემბერს ე.წ. საპრეზიდენტო არჩევნების ჩატარების პარალელურად ჩატარდეს რეფერენდუმი რუსული ენისათვის "სახელმწიფოებრივი სტატუსის" მინიჭების შესახებ.
რეფერენდუმის ჩატარების მოწინააღმდეგეთა მიმართვაში, რომელიც ოს სეპარატისტთა ლიდერს ედუარდ კოკოითს და ე.წ. ცესკოს გაეგზავნა ნათქვამია, რომ ოსური ენა ისედაც გადაშენების პირასაა და იგი მალე გაქრება მას შემდეგ რაც ე.წ. სამხრეთ ოსეთში რუსულ ენას "სახელმწიფოებრივი სტატუსი" მიენიჭება. ოსური მედია აღნიშნავს იმასაც, რომ ამ მიმართვის გაგზავნა რუსეთის პრემიერ-მინისრტრისათვის ვლადიმერ პუტინისთვისაც იგეგმება.
"ოსური ენა დღეს ძალიან სავალალო მდგომარეობაში იმყოფება, იგი მომაკვლავ ენათა რიგებში დგას და თუ ჩვენ დღეს მივიღებთ რუსული ენისათვის სახელმწიფოებრივი სტატუსის მინიჭების გადაწყვეტილებას ჩვენი ენა აღარ განვითარდება და მოკვდება.
ჩვენ რუსული ენის წინააღმდეგ არ ვართ, ჩვენ ამ საკითხზე რეფერენდუმის ჩატარებას ვეწინააღმდეგებით", _ ნათქვამია მიმართვაში.
ენასთან დაკავშირებით არსებულ პრობლემებზე აქტიური საუბარი მიმდინარეობს ასევე საქართველოს მეორე სეპარატისტულ რეგიონში - აფხაზეთში. "აფხაზური ენა "იუნესკოს" მიერ ოფიციალურად შეტანილის იმ ენების რიცხვში, რომელთაც გადაშენება ემუქრება. მდგომარეობა ამ თვალსაზრისით, აფხაზურ ენასთან დაკავშირებით დღეისათვის კრიტიკულია", _ წერს აფხაზური მედია.
"აფხაზეთის მიერ დამოუკიდებლობის მიღების შემდეგ, თითქოს ამ მიმართულებით, პრობლემის მოგვარება უნდა დაწყებულიყო. თუმცა მშობლიურ ენას კვლავინდებურად ვერ ფლობენ ქალაქში დაბადებული და გაზრდილი აფხაზებიც კი. მიუხედავად იმისა, რომ მიღებულ იქნა კანონი "სახელმწიფო ენის შესახებ" მდგომარეობა ამ მიმარულებით არ შეცვლილა. კანონის მიღებიდან ოთხი წელი გავიდა, თუმცა საქმე მკვდარი წერტილიდან არ დაძრულა", _ წერენ აფხაზეთში.
მათივე ინფორმაციით, "ყოველივე ამასთან ეთად, ბოლო დროის განმავლობაში თითქმის არაფერი ისმის აფხაზური ენის შემსწავლელი კურსების შესახებ, რომელთა რეკლამირებაც აფხაზური ტელევიზიით აქტიურად მიმდინარეობდა. სავარაუდოდ ამ კურსების ორგანიზატორებმა და დამსწრეებმა ამ საქმეზე ხელი იმიტომ ჩაიქნიეს, რომ მის უნაყოფობაში დარწმუნდნენ", _ წერენ აფხაზეთში.
