საქართველოს მთავრობა ზოგიერთი სახელმწიფო ობიექტის IPO -სთვის ემზადება. თუმცა აღნიშნული ქმედების განსახორციელებლად და ზოგიერთი სახელმწიფო კომპანიის აქციების სხვადასხვა საერთაშორისო ბირჟაზე განსათავსებლად მთავრობა საკანონმდებლო ბაზას აწესრიგებს.
პარლამენტში უკვე შესულია "სახელმწიფო ქონების შესახებ" საქართველოს კანონში შესატანი ცვლილებები.
კანონპროექტის თანახმად, წილებისა და აქციების პრივატიზება შეიძლება განხორციელდეს აუქციონისა და პირდაპირი მიყიდვის ფორმებით, ასევე გლობალური დეპოზიტარული ხელწერილების ფორმით, ან სხვაგვარად უცხო ქვეყნის აღიარებულ საფონდო ბირჟაზე საჯარო ან მოცემულ დროს საერთაშორისო კაპიტალის ბაზარზე არსებულ პრაქტიკასთან შესაბამისობაში მყოფი სხვაგვარი შეთავაზების ფორმით. აქციების განთავსება ბირჟებზე საქართველოს მთავრობის გადაწყვეტილებით, სამინისტროს წარდგინების საფუძველზე მოხდება.
კანონპროექტის განმარტებით ბარათში აღნიშნულია, რომ სამინისტრო საქართველოს მთავრობისთვის დასაბუთებული წინადადების წარდგენამდე განსაზღვრავს წილებისა და აქციების გლობალური დეპოზიტარული ხელწერილების ფორმით ან სხვაგვარად უცხო ქვეყნის აღიარებულ საფონდო ბირჟაზე საჯარო ან მოცემულ დროს საერთაშორისო კაპიტალის ბაზარზე არსებულ პრაქტიკასთან შესაბამისობაში მყოფი სხვაგვარი შეთავაზების ხელსაყრელ დროს და შეიმუშავებს შესაბამისი დოკუმენტების პროექტებს, ასევე ახორციელებს კანონმდებლობით გათვალისწინებულ სხვა ღონისძიებებს.
ამის შემდგომ, სამინისტროს დასაბუთებული წინადადება, სადაც მოცემულია პრივატიზების ზოგადი პირობები, სამინისტროს მიერ მომზადებულ დოკუმენტების პროექტებთან ერთად წარედგენება საქართველოს მთავრობას.
მთავრობის განკარგულებით განისაზღვრება წილებისა და აქციების პრივატიზების საბოლოო პირობები, მათ შორის, წილებისა და აქციების საწყისი საპრივატიზებო საფასური, ანგარიშსწორების პირობები, შესაბამისი ხელშეკრულებების გაფორმების ვადა, წილებსა და აქციებზე საკუთრების უფლების მოპოვების წესი და სხვა პირობები, რომელთა შესაბამისად საქართველოს მთავრობა უფლებას აძლევს სამინისტროს, განახორციელოს წილებისა და აქციების გლობალური დეპოზიტარული ხელწერილების ფორმით პრივატიზება ან სხვაგვარად უცხო ქვეყნის აღიარებულ საფონდო ბირჟაზე საჯარო ან მოცემულ დროს საერთაშორისო კაპიტალის ბაზარზე არსებულ პრაქტიკასთან შესაბამისობაში მყოფი სხვაგვარი ფორმით შეთავაზება და მასთან დაკავშირებული შესაბამისი ქმედებები.
"დღემდე ამის შესაძლებლობას არსებული რეგულაციები არ გვაძლევდა და გვინდა განვიხილოთ შესაძლებლობა აქციათა 15-20 %-ის განთავსებისა, ლონდონისა და ვარშავის ბირჟებზე, როგორიცაა "საქართველოს რკინიგზა", "ნავთობისა და გაზის კორპორაცია", სახელმწიფო ელეტქროსისტემა" და სხვა სახელმწიფო კომპანიები", - განაცხადა საქართველოს პრემიერ-მინისტრმა ცოტა ხნის წინ გამართულ ერთ-ერთ მთავრობის სხდომაზე.
პრემიერ-მონისტრის განმარტებით, აქციათა საერთაშორისო ბირჟებზე განთავსება საქართველოს საშუალებას მისცემს დიდი რაონებობით ახალი კაპიტალი მიზიდოს.
"ეს ყველაფერი კი სტიმულს მისცემს კერძო კომპანიებს, რომ იგივე გააკეთონ და ქვეყანაში დამატებითი კაპირტალი შემოიტანონ, რაც, თავის მხრივ, ხელს შეუწყობს ქვეყნის ეკონომიკის განვითარებასა და დასაქმებას. საერთაშორისო ბირჟებზე დღეს სახარბიელო ვითარება არ არის, თუმცა, მიუხედავად ამისა, მინდა აღვნიშნო, რომ საქართველოსადმი ნდობა შემცირებული არ არის. პირიქით, გაზრდილია და საქართველოს ფასიანი ქაღალდები კიდევ უფრო კარგად იყიდება. თუ საქართველოს 10-წლიანი სესხი აქამდე 7,1 %-ად იყიდებოდა, ახლა უფრო დაბალ 6,2 %-ში ივაჭრება, რაც იმას ნიშნავს, რომ საერთაშორისო საზოგადოება საქართველოს მაკროეკონომიკურ სტაბილურობას დადებითად აფასებს," - აღნიშნა ნიკოლოზ გილაურმა.
