ზეგაანის ღვინის ქარხანა რქაწითელის ჯიშის ყურძენს 50 თეთრად, საფერავს კი 70 თეთრად ჩაიბარებს. ამის შესახებ კახეთის საინფორმაციო ცენტრს კომპანიის დირექტორმა ბითარ ბიწკინაშვილმა განუცხადა.
„რქაწითელს 35 თეთრად ჩავიბარებთ, დამატებით, 15 თეთრს სუბსიდიის სახით სახელმწიფო გადაიხდის. საფერავში 45 თეთრს გადავიხდით, ხოლო 25 თეთრს სახელმწიფო დაამატებს. წელს სულ 300 ტონამდე ყურძნის მიღებას ვგეგმავთ," - აღნიშნა ბითარ ბიწკინაშვილმა.
ღვინის სხვა კომპანიებში, რომლებიც წელს ყურძნის მიღებას გეგმავენ, ჯერ ფასებს არ აკონკრეტებენ.
2010 წელს ღვინის ქარხნებმა ერთი კილოგრამი საფერავის ჯიშის ყურძენი 40 თეთრად ჩაიბარეს და სუბსიდიის სახით დამატებით 25 თეთრი გაიცემოდა. რქაწითელში 30 თეთრს ღვინის ქარხანა იხდიდა, 15 თეთრი სუბსიდიიდან გაიცემოდა. გასულ წელს, რამდენიმე დღის განმავლობაში, რქაწითელის ჯიშის ყურძნის ჩასაბარებელი ფასი 45 - დან 80 თეთრამდეც გაიზარდა.
