დღეს, 31 აგვისტოს, 11:00 საათზე, საქართველოს ეკონომიკისა და მდგრადი განვითარების სამინისტროში ტურიზმის ეროვნული სააგენტოს თავმჯდომარე მაია სიდამონიძე გამართავს პრესკონფერენციას. იგი მედიის წარმომადგენლებს ტურიზმის ეროვნული სააგენტოს ახალი პროექტის - "ტურიზმის კარიერის კვირეულიის" დეტალებს გააცნობს, რომელიც 19-24 სექტემბერს გაიმართება.
"ტურიზმის კარიერის კვირეული" მიზნად ისახავს დაინტერესებულ პირთა დასაქმების ხელშეწყობას ტურიზმისა და სტუმარმასპინძლობის სფეროში და სერვისის დონის ამაღლებას კომპანიებისთვის მაღალკვალიფიციური კადრების შეთავაზებით. ღონისძიება ემსახურება აგრეთვე კადრების კვალიფიკაციის ამაღლებას, დაინტერესებული აუდიტორიისთვის სათანადო ინფორმაციის მიწოდებას ტურიზმისა და სტუმარმასპინძლობის ინდუსტრიაზე და საქმიანობის სპეციფიკაზე.
