1-5 სექტემბერს საქართველოს ეროვნული საინვესტიციო სააგენტოს ორგანიზებითა და "სამტრესტის" დახმარებით, ქართული ალკოჰოლური და არაალკოჰოლური სასმელების მწარმოებელი 10 კომპანიის წარმომადგენლები მონაწილეობას მიიღებენ ჩინეთის ქალაქ ურუმჩიში გამართულ მასშტაბურ ექსპოზიციაში - "China-Eurasia Expo 2011" .
ღონისძიებაში მონაწილეობას მიიღებს სხვადასხვა კომპანიის 2500-მდე წარმომადგენელი.
აღსანიშნავია, რომ საქართველოს ეროვნული საინვესტიციო სააგენტო თავად წარადგენს ქართულ კომპანიებს ექსპოზიციაზე და დაეხმარება მათ საჭირო ბიზნესკონტაქტების დამყარებაში. ქართულ კომპანიებს შორისაა ღვინის, არყისა და ბიოწვენის მწარმოებლები.
საქართველოს ეროვნული საინვესტიციო სააგენტო და "რაკია" საქართველოს თავისუფალი ინდუსტრიული ზონა წარმოდგენილები იქნებიან საქართველოს ეროვნულ სტენდთან. საინვესტიციო სააგენტო პოტენციურ ინვესტორებს გააცნობს მიმდინარე საინვესტიციო პროექტებსა და საპრივატიზაციო ობიექტებს.
2011 წლის ივნისში საქართველოს ეროვნული საინვესტიციო სააგენტოს ექსპორტის ხელშეწყობის სამსახურის წარმომადგენლები უკვე იმყოფებოდნენ ქალაქ ურუმჩიში, სადაც მოაწყვეს ქართული ღვინის დეგუსტაცია, შეხვდნენ ურუმჩის სავაჭრო-სამრეწველო პალატის წარმომადგენლებს და გაიცნეს ადგილობრივი სადისტრიბუციო კომპანიების ხელმძღვანელობა. ვიზიტის შედეგად ექსპორტის ხელშეწყობის სამსახური ფლობს ალკოჰოლური სასმელების სადისტრიბუციო კომპანიების მონაცემთა ბაზას და სურვილისამებრ აწვდის ქართულ კომპანიებს, რომლებსაც აინტერესებთ ჩინეთის ბაზარზე შესვლა და ექსპორტის განხორციელება.
