კალათბურთში ევროპის ჩემპიონატის დღეებში, ლიტვაში, ქალაქ კლაიპედაში ქართული აგროსასურსათო პროდუქციის გამოფენა მოეწყობა. პროექტის ფარგლებში, კლაიპედაში მოეწყობა ქართული პროდუქციის კუთხე, სადაც წარმოდგენილი იქნება საქართველოში დამზადებული, ნატურალური ყურძნის ღვინოები, მინერალური წყალი, უალკოჰოლო
გაზიანი სასმელები, ჩაი, მშრალი ხილი, თხილი და სხვა პროდუქტები.
სოფლის მეურნეობის სამინისტროში ფიქრობენ, რომ აღნიშნული გამოფენა ქართული პროდუქციის პოპულარიზაციას და საექსპორტო პოტენციალის ზრდას შეუწყობს ხელს. გამოფენის ორგანიზებისთვის და სხვადასხვა საორგანიზაციო საკითხების მოსაგვარებლად, „რეგიონებში სოფლის მეურნეობის განვითარების პროგრამით" გათვალისწინებული ასიგნებებიდან, სოფლის მეურნეობის სამინისტროს 100 ათასი ლარი გამოეყოფა.
შეგახსენებთ, რომ საქართველოს კალათბურთელთა ნაკრები ლიტვაში 31 აგვისტოდან 18 სექტემბრამდე გასამართ ევროპის ჩემპიონატზე სლოვენიის, რუსეთის, ბელგიის, ბულგარეთისა და უკრაინის ნაკრებების წინააღმდეგ D ჯგუფში ითამაშებს.
ქართველ კალათბურთელთა მეტოქეები 30 იანვარს ლიტვის დედაქალაქ ვილნიუსის "დრამის თეატრში" გამართულ კენჭისყრაზე გამოვლინდნენ.
D ჯგუფის შეხვედრები ქალაქ კლაიპედაში გაიმართება და 31 აგვისტოს საქართველო - ბელგიის შეხვედრით გაიხსნება. პირველი ჯგუფური ეტაპიდან 4 6-გუნდა ჯგუფში გადანაწილებული 24 გუნდიდან, მეორე ეტაპზე 3-3 საუკეთესო გააგრძელებს თამაშს. საქართველოს კალათბურთელთა ნაკრები ევროპის ჩემპიონატზე პირველად მიიღებს მონაწილეობას.