თხილის ექსპორტიორთა კავშირი შემოსავლების სამსახურის მიერ თხილის გადამუშავებისას საწარმოთა დანაკარგების დაანგარიშების არსებული სქემით უკმაყოფილოა.
როგორც სააგენტო "ჯი-ეიჩ-ენთან" საუბრისას, თხილის ექსპორტიორთა კავშირის აღმასრულებელმა დირექტორმა მიშა ხომერიკმა განაცხადა, თხილის გადამამუშავებელი ქარხნებისათვის მიღებული იქნა 15%-იანი დანაკარგის ნორმა და ეს შრობის დანაკარგად ჩათვალეს.
"თუ ღრმად ჩავუფიქრდებით დავინახავთ, რომ ეს შეიცავს გარკვეულ საფრთხეებსა
და უმჯობესია, ქარხნებთან კონსულტაციის საფუძველზე შედგენს დანაკარგების ნორმა, რომელიც დამოკიდებული იქნება: თხილის შესყიდვის დროზე. მაგალითად, აგვისტოში შრობის დანაკარგი შეადგენს 15%, ხოლო სექტემბერ-დეკემბერში - 2-10%-ს. ამიტომ შემოწმების დროს საგადახადო ორგანოს ყოველთვის ექნება საშუალება შეედავოს ქარხანას, რომ ოქტომბერში შეძენილი თხილის შრობის დანაკარგი არ არის 15%, და მართალიც იქნება"- აცხადებს ხომერიკი.
მისი თქმით, თხილის გამოსავლიანობა (რა თქმა უნდა, საშუალო) დამოკიდებულია რეგიონზე და ის იცვლება 33%-42%.
"დღეისათვის ეს ნორმა არსად დაფიქსირებული არ არის და ადვილი შესაძლებელია საგადასახადომ გამოიყენოს სხვა ქვეყნის ნორმები (თურქეთი - 52-56% ან აზერბაიჯანი - 45%) რაც ქართული ჯიშების შემთხვევაში არარეალურია", - აღნიშნა თხილის ექსპორტიორთა კავშირის აღმასრულებელმა დირექტორმა მიშა ხომერიკმა.
შეგახსენებთ, რომ 2011 წლის მაისში შემოსავლების სამსახურმა თხილის გადამუშავებისას საწარმოო დანაკარგის ოდენობა განსაზღვრა. სამსახურის ინფორმაციით, თუკი, ადრე საწარმოო დანაკარგს დანაკლისად მიიჩნევდნენ და იბეგრებოდა საგადასახადო კანონმდებლობის შესაბამისად, ამიერიდან, აღნიშნული დანაკარგები დადგენილი ნორმის ფარგლებში აღარ დაიბეგრება. საწარმოო დანაკარგების ოდენობა შემოსავლების სამსახურში შექმნილმა კომისიამ მეწარმეებისგან მოწოდებული ინფორმაციისა და საერთაშორისო გამოცდილებაზე დაყრდნობით განსაზღვრა. კერძოდ, დაუმტვრეველი თხილის გადამუშავებისას მისი ბუნებრივი შრობისას (ტენის შემცირების) საწარმოო დანაკარგი განისაზღვრა 15%-ს ოდენობით. შემოსავლების სამსახურის ინფორმაციითვე, მნიშვნელოვანია ისიც, რომ სურვილის შემთხვევაში მეწარმეებს შეეძლებათ მიმართონ შემოსავლების სამსახურს, რომელიც მათ საწარმოო დანაკარგს, გარკვეულ ფასად განსაზღვრავს. დანაკარგების დადგენილი ოდენობა შემდგომში სავალდებულო წესით იქნება გათვალისწინებული გადასახადების ადმინისტრირების, მათ შორის, შემოწმების დროს.
