აშშ-ის ელჩი ჯონ ბასი და საქართველოს ენერგეტიკის მინისტრი ალექსანდრე ხეთაგური თუშეთის სოფელ შენაქოში საზეიმოდ გახსნიან მცირე მოცულობის ჰიდროელექტროსადგურს. ამის შესახებ "ჯი-ეიჩ-ენს" აშშ-ის საელჩოდან აცნობეს.
ჰიდროელექტროსადგური ეკოლოგიურად სუფთა და განახლებადი ენერგიით უზრუნველყოფს სოფლის 60 ოჯახსა და საზღვრის დაცვის ახლომდებარე საგუშაგოებს.
აშშ-ის მთავრობამ, ამერიკის საერთაშორისო განვითარების სააგენტოს (USAID) მეშვოებით, პროექტის დასაფინანსებლად 87 000 დოლარი გამოყო. პროექტს ახორცილებდა USAID-ის პარტნიორი ორგანიზაცია Winrock
International-ი
ჰიდროელექტროსადგურის მიერ გამომუშავებული ენერგია ახალ ეკონომიკურ შესაძლებლობებს შექმნის და ხელს შეუწყობს მთიან რეგიონში ტურიზმის განვითარებას. ჰიდროელექტროსადგური შენაქოსა და მისი მეზობელი სოფლებისათვის საკმარის ენერგიას გამოიმუშავებს. მას შემდეგ, რაც 1988 წელს დაზიანდა შენაქოს გადამცენი ხაზი, სოფელს არ მიეწოდებოდა ელექტროენერგია.
პროექტის განხორციელებაში მნიშვნელოვანი წვლილი შეიტანა სოფლის მოსახლეობამ, აგრეთვე საქართველოს ენერგეტიკისა და ბუნებრივი რესურსების სამინისტრომ, რომლის დახმარებით დასრულდა სოფელთან დამაკავშირებელი გადამცემი ხაზის მშენებლობა. ამ პროექტით, აშშ-ის მთავრობა ეხმარება საქართველოს ეკოლოგიურად სუფთა ენერგიის გამომუშავებაში, რაც ქმნის ახალ ეკონომიკურ შესაძლებლობებს და აუმჯობესებს ქვეყანაში მოსახლეობის ცხოვრების დონეს.