მოსახლეობიდან თხილის შესყიდვით ამ დროისათვის ათამდე კომპანიაა დაკავებული. როგორც სააგენტო "ჯი-ეიჩ-ენთან" საუბრისას, თხილის ექსპორტიორთა კავშირის აღმასრულებელმა დირექტორმა მიშა ხომერიკმა განაცხადა, საქართველოში შარშანდელთან შედარებით, საკმაოდ კარგი მოსავალია, თუმც თხილის გამოსავლიანობა წინა წლებისაგან განსხვავებით შედარებით მცირეა.
ხომერიკის თქმით, თხილს ათამდე კომპანია იბარებს, მათ შორის ""ჯი-ენ კომპანი", "თხილის საექსპორტო კომპანია", "დიოსკურია 21", "ლესმატი" და სხვა. ამ დროისათვის მაღალი ხარისხის თხილის ფასი, ადგილზე 2,80-2,85 ლარია.
თხილის ექსპორტიორთა კავშირის აღმასრულებელმა დირექტორის თქმით, წელს საქართველოში 40 ათას ტონაზე მეტი თხილის მოსავალი იქნება.
ხომერიკი თხილის ჩამბარებელი პუნქტების არამიზნობრიობაზეც საუბრობს იმ მიმართულებით, რომ ესეთი პუნქტები არ არიან ოფიციალურად დარეგისტრირებულები და, შესაბამისად, არ იხდიან გადასახადს. იმავდროულად, ჩამბარებელი პუნქტი არის შუამავალი რგოლი გლეხსა და თხილის გადამამუშავებელ კომპანიას შორის, რომელიც თავის მხრივ, კომპანიას პროდუქციას ნამატი თანხით აბარებს.
სტატისტიკის ეროვნულ სამსახურში განმარტავენ, რომ გასულ წელს ქვეყნის მასშტაბით 28,8 ათასი ტონა თხილის მოსავალი იყო. "საქსტატის" ინფორმაციით, 2010 წელს რეგიონების მიხედვით ყველაზე მეტი თხილი სამეგრელო-ზემო სვანეთში იწარმოა - 20.8 ათასი ტონა, გურიაში - 3.7 ათასი ტონა, იმერეთში 2.4 ათასი ტონა, ხოლო დარაჩენ რეგიონებში კი 1.9 ათასი ტონა.