აბაშა-სენაკის გაზსადენის მშენებლობისთვის საჭირო მასალების შესყიდვაზე გამოცხადებულ ტენდერში შვიდი კომპანია მონაწილეობს.
საქართველოს ნავთობისა და გაზის კორპორაციის ინფორმაციით, საერთაშორისო ტენდერში მონაწილეობის სურვილი თორმეტმა კომპანიამ გამოთქვა. სატენდერო დოკუმენტაცია კორპორაციაში შვიდმა კომპანიამ წარადგინა. სატენდერო კომისია წარმოდგენილ დოკუმენტაციას შეისწავლის და გამარჯვებულ კომპანიას უახლოეს მომავალში დაასახელებს.
აბაშა-სენაკის 700 მმ-იანი გაზსადენის მშენებლობა დაგეგმილია ამერიკის შეერთებული შტატების საერთაშორისო განვითარების სააგენტოსა (USAID) და საქართველოს მთავრობას შორის ხელმოაწერილი ხელშეკრულების ფარგლებში, რომელიც ენერგოუსაფრთხოების ხელშეწყობას ითვალისწინებს.
გაზსადენის მშენებლობა 2012 წლის გაზაფხულზე დაიწყება.
შეგახსენებთ, რომ ამერიკის შეერთებული შტატების საერთაშორისო განვითარების სააგენტომ (USAID) და საქართველოს მთავრობამ ხელი მოაწერეს ხელშეკრულებას ენერგოუსაფრთხოების ხელშეწყობის მიზნით დახმარების გამოყოფის თაობაზე. აღნიშნული გულისხმობს დასავლეთ საქართველოს მოსახლეობისთვის ელექტროენერგიისა და ბუნებრივი გაზის ხელმისაწვდომობის გაზრდას, შავი ზღვის სანაპიროზე ფოთის თავისუფალი ეკონომიკური ზონის განვითარებას და ინფრასტრუქტურის სანდოობის გაზრდის გზით ენერგიის უსაფრთხო ექსპორტს.