აჭარის მთავრობის თავმჯდომარემ გომარდულის სამთო კურორტზე 5 ახალი კოტეჯის, რესტორნის, კულტურისა და სპორტის ცენტრების მშენებლობის დინამიკა მოიწონა. ვარშალომიძემ მშენებლებთან შეხვედრისას განაცხადა, რომ გომარდული მიმდინარე წლის სათხილამურო სეზონს მთლიანად მომზადებული უნდა შეხვდეს.
აჭარის მთავრობის ინფორმაციით, კურორტზე სამშენებლო სამუშაოებს სს „გომარდული" ახორციელებს და იქ 70-მდე ადგილობრივი მცხოვრებია დასაქმებული. ახალ ობიექტებზე მინიმუმ 20 ადამიანი იმუშავებს.
პარალელურად, ღომას მთაზე ახალი სამთო-სათხილამურო კურორტის მშენებლობისთვის მოსამზადებელი სამუშაოებიც მიმდინარეობს. ამჟამად, წაბლანა-ღომას მთის მიმართულებით 7-კილომეტრიან მონაკვეთზე კეთდება გზა, რისთვისაც 640 ათასი ლარია გამოყოფილი. გზის რეაბილიტაცია ზამთრის დადგომამდე დასრულდება.
ლევან ვარშალომიძემ უჩამბაში სკოლის სარემონტო სამუშაოებიც მოინახულა. მთავრობის თავმჯდომარემ მშენებლებს რეაბილიტაციის დაჩქარება დაავალა, რათა ბავშვებმა სწავლის განახლება ოქტომბრის ბოლოს მაინც შეძლონ. უჩამბის სკოლა წლის დასაწყისში ხანძარმა დააზიანა.