საერთაშორისო კირიზისულმა ჯგუფმა (International Crisis Group, ICG) 2008 წლის აგვისტოს ომის შემდეგ, რუსეთ-საქართველოს ურთიერთობების სხვადასხვა ასპექტების შესახებ საკუთარი მოხსენება გამოაქვეყნა, რომელშიც ერთ-ერთი მთავარი მიმართულება საქართველოში რუსული ინვესტიციების ზრდაა.

ICG-ის მოხსენების მიხედვით, 2010 წლისთვის საქართველოში რუსული ინვესტიციები წინა წლებთან შედარებით 5-ჯერ გაიზარდა, თუმცა ჯერაც ვერ მიაღწია ომამდელ დონეს.

"2010 წელს, პირდაპირმა რუსულმა ინვესტიციამ საქართველოს ეკონომიკაში 51 მლნ. აშშ. დოლარი შეადგინა, მაშინ როდესაც 2009 წელს რუსული ინვესტიციის მოცულობა 10 მლნ. დოლარს შეადგენდა, ხოლო 2007 წელს კი - 89 მლნ. დოლარს.

ომისა და საერთაშორისო ეკონომიკური კრიზისის გამო, პირდაპირი უცხოური ინვესტიციები საქართველოში 2009 წელთან შედარებით 16 %-ით შემცირდა. ამ ფონზე, რუსულმა კომპანიებმა, საქართველოში საკუთარი ინვესტიციები გაზარდეს - განსაკუთრებით ენერგეტიკულ, საფინანსო, სამთო-მომპოვებელ, კვების მრეწველობისა და ტელეკომუნიკაციის სეროში.

სულ განხორციელებული ინვესტიციის მოცულობამ 51 მლნ. დოლარი შეადგინა, რაც საქართველოში განხორციელებული პირდაპირი უცხოური ინვესტიციების 9 %-ს შეადგენს",- ნათქვამია მოხსენებაში.

მოხსენებაში ასევე აღნიშნულია, რომ საქართველომ და რუსეთმა მოახდინეს, თანამშრომლობის დემონსტრირება სატრანსპორტო კავშირის სფეროში, კერძოდ 2010 წელს აღდგა საჰაერო მიმოსვლა მოსკოვსა და თბილისს შორის.

"ორი ქვეყნის ხელისუფლება ასევე აგრძელებს ხელშეკრულებების გაფორმებას ენერგეტიკის სფეროში", - ნათქვამია მოხსენებაში.
შეგახსენებთ, რომ ICG რომლის შტაბ-ბინაც ბრიუსელში მდებარეობს, შექმნილია კომფლიქტების შეჩერების, მათი თავიდან აცილებისა და სხვა შესაბამისი საკითხების ხელშეწყობის მიზნის. ICG-ის საბჭოში შედიან ცნობილი პოლიტიკოსები, ექსპერტები, დიპლომატები, ბიზნესმენები და მედიის წარმომადგენლები.