ტურიზმის სექტორის ხელშესაწყობად ტურიზმის ეროვნული სააგენტო წლის ბოლომდე რამდენიმე პროექტის განხორციელებას გეგმავს, მათ შორის ,კარიერის კვირეული, რომელიც მიზნად ისახავს დაინტერესებულ პირთა დასაქმებას ტურიზმისა და სტუმარმასპინძლობის სფეროში და სერვისის დონის ამაღლებას კომპანიებისთვის მაღალკვალიფიციური კადრების შეთავაზებით. ღონისძიება ემსახურება აგრეთვე დაინტერესებული აუდიტორიისთვის სათანადო ინფორმაციის მიწოდებას ტურიზმისა და სტუმარმასპინძლობის ინდუსტრიაზე, მისი განვითარების ტენდენციებზე, საქმიანობის სპეციფიკასა და კადრების კვალიფიკაციის ამაღლების შესახებ;
წლის ბოლომდე გაგეგმილია ასევე სასწავლო ცენტრის შექმნა დასაქმების ხელშეწყობით და საკონსულტაციო მომსახურება მცირე და საშუალო ბიზნესის ხელშესაწყობად და გასავითარებლად.
ტურიზმის ეროვნულ სააგენტოში მიიჩნევენ, რომ მომავალში საქართველოში ტურიზმი შესაძლოა, ერთ-ერთი ყველაზე მნიშვნელოვანი სექტორი გახდეს ახალი სამუშაო ადგილების შექმნის მიმართულებით.
"საქართველოს მიმზიდველი საინვესტიციო კლიმატი ბაზარზე ახალი ტრანსნაციონალური კორპორაციების შემოსვლას განაპირობებს, შენდება ახალი სასტუმროები, კვების ობიექტები, ვითარდება გართობის ინდუსტრია" -ამის შესახებ განცხადება ტურიზმის ეროვნული სააგენტოს ხელმძღვანელმა მაია სიდამონიძემ გააკეთა. სიდამონიძის განმარტებით, თუ 2009 წელს ტურიზმის სექტორში 45896 მოქალაქე იყო დასაქმებული, 2011 წლის აგვისტოს მაჩვენებელმა 60982-ს მიაღწია. ახალი და დაგეგმილი პროექტების განხორციელების შედეგად წლის ბოლომდე რამდენიმე ათასი ახალი სამუშაო ადგილი შეიქმნება.
ტურიზმის ეროვნული სააგენტოს ხელმძღვანელის მაია სიდამონიძის განმარტებით, გაეროს მსოფლიო ტურიზმის ორგანიზაციის შეფასებით, საქართველო უცხოელი ტურისტების ზრდის ტემპით გამორჩეული ქვეყანაა, ტურისტული ნაკადის ასეთი მკვეთრი ზრდა იწვევს ინფრასტრუქტურისა და მომსახურების სფეროს სწრაფ განვითარებას, რაც ხელს უწყობს ახალი სამუშაო ადგილების შექმნას, სიდამონიძე აცხადებს, რომ ტურიზმი მსოფლიოში მნიშვნელოვან როლს თამაშობს ახალი სამუშაო ადგილების შექმნის, მცირე და საშუალო ბიზნესის და ინფრასტრუქტურის განვითარებისა და საექსპორტო შემოსავლების ზრდის მიმართულებით. მსოფლიოში დაახლოებით 235 მილიონი ადამიანია დასაქმებული ტურიზმის ინდუსტრიაში, რაც დასაქმების 8% შეადგენს.