შემოსავლების სამსახურის ინიციატივით, დღეიდან, უბნის საგადასახადო ოფიცრის ინსტიტუტი ამოქმედდა. შემოსავლების სამსახურის, საზოგადოებასთან ურთიერთონის დეპარტამენტის წარმომადგენლის ანა გოგიჩაძის განმარტებით, საგადასახადო ოფიცრის მთავარი მოვალეობა გადამხდელების დახმარება და პრობლემების მოგვარების კუთხით, კონსულტაციის გაწევა იქნება.
"საგადასახადო ოფიცრები უბნების მიხედვით იქნებიან გადანაწილებული. ისინი ყოველდღიურად ფეხით ან საჯარო ტრანსპორტით შემოივლიან უბანს, შეხვდებიან გადამხდელებს და საჭირო დახმარებას გაუწევენ. კონსულტირების პარალელურად, უბნის საგადასახადო ოფიცრები მეწარმეებს შემოსავლების სამსახურში მიმდინარე რეფორმებსა თუ სიახლეებსაც გააცნობენ"- აცხადებს გოგიჩაძე.
შემოსავლების სამსახურში განმარტავენ, რომ გადამხდელებს ხშირად უჩნდებათ შეკითხვები გარკვეულ საკითხებთან დაკავშირებით. ამიერიდან კი პასუხების მიღება და სხვადასხვა ტიპის პრობლემის გადაჭრა ობიექტიდან გაუსვლელად იქნება შესაძლებელი. უბნის საგადასახადო ოფიცრის დახმარებით, რომელიც უახლესი ტექნიკით იქნება აღჭურვილი, გადამხდელებს ადგილზევე შეეძლებათ რამდენიმე მომსახურების მიღება, რაც აქამდე მხოლოდ სერვის ცენტრებში იყო შესაძებელი. გარდა იმისა, რომ უბნის საგადასახადო ოფიცრები თავად მივლენ გადამხდელებთან, თითოეულ მეწარმეს ექნება მათი ტელეფონის ნომერი.
აღსანიშნავია, რომ უბნის საგადასახადო ოფიცერის ფუნქციაში არ შედის მოქალაქეთა დაჯარიმება. ის ორიენტირებული იქნება მხოლოდ მეწარმეთა კონსულტირებაზე, მათ დახმარებაზე და გაფრთხილებით შემოიფარგლება. გადამხდელს შეეძლება ნებსიმიერი საკითხის განიხილვა საგადასახადო ოფიცერთან, უზუსტობის აღმოჩენის შემთხვევაში კი ამას არ მოყვება საგადასახადო შემოწმება.
პროექტი პილოტურია და ის მხოლოდ თბილისს მოიცავს, შემდეგ უბნის საგადასახადო ოფიცერის ინსტიტუტი რეგიონებშიც ამოქმედდება. საწყის ეტაპზე პროგრამაში 80 ადამიანი ჩაერთვება. გადამხდელებთან სწორი ფორმით ურთიერთობისათვის უბნის საგადასახადო ოფიცრები შესაბამის ტრეინინგებსაც გადიან.
