დღეს, 9 აგვისტოს, ბათუმში ტურიზმის განახლებული საინფორმაციო ცენტრები გაიხსნება. როგორც სააგენტო "ჯი-ეიჩ-ენთან" საუბრისას აჭარის ტურიზმის დეპარტამენტის თავმჯდომარემ ვაჟა დიასამიძემ განაცხადა, საინფორმაციო ცენტრები ბათუმის ბულვარის შესასვლელში და რუსთაველისა და მელიქიშვილის ქუჩების კვეთაში გაიხსნება.
დიასამიძე აცხადებს, რომ საინფორმაციო ცენტრები ტურისტებს მრავალი სახის მომსახურებას შესთავაზებს. მომხმარებელს საშუალება ექნება, ცენტრებში შეიძინოს სხვადასხვა სახის სუვენირები, იყიდოს ტურპაკეტები, დაჯავშნოს სასტუმროები, ისარგებლოს გიდის მომსახურებით, მათ შორის, აუდიოგიდის.
საინფორმაციო ცენტრებში შესაძლებელია, ასევე, დარეგისტრირება ბათუმის ველობარათის მფლობელად; პარკირების ბარათებისა და მუნიციპალური ტრანსპორტის ბილეთების შეძენა; სხვადასხვა გასართობი დაწესებულებების პროგრამისა და ბილეთების შეძენა.
