2012-2015 წლებში ნაერთ ბიუჯეტში მობილიზებული თანხის მოცულობას ზრდის ტენდენცია ექნება. ამის შესახებ დოკუმენტის -"ქვეყნის ძირითადი მონაცემები და მიმართულებები 2012-2015 წლებისათვის" (BDD) - პირველად ვარიანტშია ნათქვამი.
მთავრობაში განმარტავენ, რომ 2012 წლისთვის ნაერთი ბიუჯეტის შემოსავლების საპროგნოზო მაჩვენებლების მშპ-სთან ფარდობის მაჩვენებელი 27.3 პროცენტს მიაღწევს, ხოლო გადასახადების წილი მთლიანი შიდა პროდუქტის მიმართ 24.6 პროცენტს გაუტოლდება.
2012 წელს ნაერთი ბიუჯეტის სხვა შემოსავლების წილი მთლიანი შიდა პროდუქტის მიმართ სავარაუდოდ 1.9 პროცენტს გაუტოლდება. ხოლო 2012 წელს ნაერთი ბიუჯეტის არაფინანსური და ფინანსური აქტივების რეალიზაციიდან მისაღები თანხების მოცულობა მშპ-სთან მიმართებაში, შესაბამისად, 0.4 და 0.1 პროცენტამდეა ნავარაუდები. აღსანიშნავია, რომ საშუალოვადიან პერიოდში საბიუჯეტო შემოსულობების პროგნოზული გათვლების გაკეთებისას გათვალისწინებულ იქნა ფისკალურ სფეროში მომხდარი ცვლილებები და მის მიერ გამოწვეული შესაძლო შედეგები.
შეგახსენებთ, რომ ნაერთი ბიუჯეტის შემოსავლების მოცულობა 2011 წელს 6 724.7 მლნ ლარით განისაზღვრა, ხოლო მისი წილი მშპ-ის მიმართ 28.7 პროცენტს გაუტოლდა. ნაერთი ბიუჯეტის გადასახადების მოცულობა განისაზღვრა 5 930.0 მლნ ლარით, ხოლო მისი წილი მშპ-ის მიმართ 25.3 პროცენტს შეადგენს.
