შემოსავლების სამსახურის ინიციატივით, ,,ალტერნატიული აუდიტი"-ს პროექტში მცირე მეწარმეებიც ჩაერთვებიან, რაც იმას ნიშნავს, რომ გადამხდელს შეუძლია თავად გადაწყვიტოს, ვინ შეამოწმოს შემოსავლების სამსახურმა, თუ კერძო აუდიტორმა.
შესაბამისად, შემოსავლების სამსახური „ალტერნატიული აუდიტი"-ს პროექტის ფარგლებში იწყებს კერძო აუდიტორთა შერჩევას იმ გადასახადის გადამხდელთა საგადასახადო აუდიტის ჩასატარებლად, რომელთა წლიური ბრუნვა დეკლარირებულ მონაცემთა საფუძველზე არ აღემატება 100 000 ლარს, კერძოდ: გადასახადის გადამხდელს შემოწმების შესახებ შეტყობინების მიღების შემდეგ უფლება ეძლევა აირჩიოს კერძო აუდიტორი, რომლის მონაცემები შერჩევის შემდეგ გამოქვეყნდება www.rs.ge - ზე.
აუდიტორის მიერ ჩატარებული აუდიტის შედეგად იწერება შესაბამისი დასკვნა, რომლის საფუძველზე გადამხდელი უფლებამოსილია დააზუსტოს დეკლარაცია და აღიაროს საგადასახადო ვალდებულება, შესაბამისად აღნიშნულ ნაწილში საგადასახადო სამართალდარღვევისათვის არ დაეკისრება ჯარიმა. ამასთან, აღნიშნული პერიოდი გადამხდელს ჩაეთვლება უკვე შემოწმებულად.
შემოწმების პროცესში აუდიტორს უფლება ეძლევა საჭიროების შემთხვევაში მოსთხოვოს გადასახადის გადამხდელს მისი თანდასწრებით სასაქონლო-მატერიალური მარაგების ინვენტარიზაციის ჩატარება, რომლის შედეგად გამოვლენილ ზედმეტობაზე ან/და დანაკლისზე ასევე არ გავრცელდება საჯარიმო სანქციები.
ზემოაღნიშნული აუდიტორიული მომსახურების ანაზღაურება მოხდება გადასახადის გადამხდელის მიერ, რომლის ოდენობაც დგინდება ურთიერთშეთანხმების შედეგად, ამასთან კომპენსაციის თანხა მხოლოდ საგადასახადო აუდიტის ფარგლებში არ უნდა აღემატებოდეს 1000 ლარს.
დაინტერესებულ პირებს: ინდმეწარმეებსა, ფიზიკურ და იურიდიულ პირებს შეუძლიათ შეავსონ სპეციალური განაცხადი და გადააგზავნონ ელ. მისამართზე: audit@rs.ge ან წარადგინონ შემოსავლების სამსახურის აუდიტის დეპარტამენტში. მის. თბილისი, გულუას ქ. №4, (ყოფილი თბილისის რეგიონული სერვის ცენტრის შენობა).