ივლისში მენეჯმენტ კომპანია „დექსუსმა"„ცენტრ პოინტის" კიდევ 3 შეჩერებული პროექტი განაახლა. მოსკოვის პროსპექტზე მდებარე „თეთრი სახლისა" და სააკაძის კომპლექსის შემდეგ, დღეს სამშენებლო სამუშაოები ხოშარაულის ქუჩაზე მდებარე მე-4 კორპუსში, ე.წ „ხერხზეც" განახლდა.
კომპანიის ინფორმაციით, „ხერხი" ორი კორპუსისგან - ე.წ. „დიდი" და „პატარა" „ხერხებისგან" შედგება. მათი დასრულების შემდეგ კუთვნილ საცხოვრებელ და კომერციულ ფართს 330მომხმარებელი მიიღებს. სამშენებლო სამუშაოების განახლების პარალელურად, ტრადიციულად გამოცხადდა ობიექტის დასრულების კონკრეტული თარიღიც: მე-4 კორპუსი 2012 წლის ოქტომბერში დასრულდება. ობიექტის მშენებლობაში „დექსუსი" 4 მილიონი ლარის ინვესტიციას განახორციელებს.
„დექსუსის" დირექტორის გიორგი ქანანაშვილის განცხადებით, „ცენტრ პოინტის" რეაბილიტაციაგეგმის მიხედვით, აქტიურად მიმდინარეობს.
„ივლისის თვე საკმაოდ დატვირთული გვქონდა. დამატებით 3 პროექტი განვაახლეთ და ამ 3 ობიექტის დასრულების შემდეგ კუთვნილ ფართს საერთო ჯამში, 1000-მდე მომხმარებელი მიიღებს ",- აღნიშნავს გიორგი ქანანაშვილი.
„ცენტრ-პოინტის" მართვაში აღების შემდეგ „დექსუსმა" უკვე 12 ობიექტის მშენებლობა განაახლა. 5 პროექტიუკვე დასრულდა და ამ დასრულებული პროექტებით „ცენტრ პოინტის" 625 მომხმარებელი დაკმაყოფილდა. ამჟამად სამშენებლო სამუშაოები 7 პროექტზე მიმდინარეობს. ცნობილია მათი დასრულების თარიღებიც: 6 სექტემბერს „დიდი დიღმის ოაზისის" მე-2 კორპუსი გაიხსნება, პირველ ნოემბერს კი - მე - 4 კორპუსი. ამას გარდა, 24 სექტემბერს „დექსუსი" ბათუმის „თეთრი მაგნოლიას" დაასრულებს, პირველ ოქტომბერს კი წყნეთის საცხოვრებელ კომპლექსს გახსნის. რაც შეეხება „თეთრ სახლსა" და სააკაძის კომპლექსს, მოსკოვის პროსპექტზე მდებარე ობიექტი მთლიანად 2012 წლის 28 მარტს დასრულდება. იმავე დღეს დამთავრდება სააკაძის კომპლექსის პირველი ეტაპის სამუშაოებიც.ე.წ. „ხერხი" კი 2012 წლის ოქტომბერში დასრულდება.
შეგახსენებთ, რომ "დექსუსმა "სამშენებლო ბაზრის ყველაზე მსხვილი, „ცენტრ პოინტის" ქოლგის ქვეშ გაერთიანებულ კომპანიათა ჯგუფის 100%-ანი წილი მართვაში 2010 წლისსექტემბერში აიღო. „დექსუსის" მართვაში შესვლამდე პროექტებში სამშენებლო სამუშაოები პრაქტიკულად შეჩერებული იყო. კომპანიის მიერ შემუშავდა „ცენტრ პოინტის" რეაბილიტაციის გეგმა. გეგმის მიხედვით, 2013 წლის ბოლომდე „ცენტრ პოინტის" ყველა მომხმარებელი უნდა დაკმაყოფილდეს.