ქართველი და პოლონელი ბიზნესმენები საერთო საპარტნიორო კომპანიებს შექმნიან. ამის შესახებ კერძო სექტორს პოლონეთის პრეზიდენტმა მოუწოდა.
ეკონომიკისა და მდგრადი განვითარების მინისტრის ვერა ქობალიას შეფასებით, ქართულ პოლონური ბიზნესფორუმი ხელს შეუწყობს საქართველოში პოლონური ინვესტიციების შემოსვლას
"პოლონეთსა და საქართველოს შორის სავაჭრო ბურნვა და ეკონომიკური ურთიერთობები მნიშვნელოვნად იზრდება. ასევე ჩვენთვის მნიშვნელოვანია, რომ დღევანდელი ბიზნესფორუმი სწორედ პოლონეთის პრეზიდენტმა გახსნა და თავის გამოსვლაში ხაზი გაუსვა იმას, რომ პოლონელმა ბიზნესმენებმა ინვესტიციები უნდა ჩადონ საქართველოში"- აღნიშნა ქობალიამ.
მინისტრის თქმით, ბიზნესფორუმზე ბრონისლავ კომაროვსკიმ ქართველ და პოლონელ ბიზნესმენებს მოუწოდა შექმნან საერთო საპარტნიორო კომპანიები და ასევე აღნიშნა, რომ ქართული ბიზნესის გამოჩენა ვარშავის ბაზარზე ძალიან სასიხარულო იქნება.
"დღევანდელი ბიზნეს ფორუმი შექმნის პირველ ნაბიჯებს ისეთ მიმართულებებში, როგორიც არის სოფლის მეურნეობა, საბანკო სექტორი და ჯანდაცვის სფერო. ფორუმს სწორედ დღეს აღნიშნული სფეროში მოღვაწე ბიზნესმენები ესწრებიან" - განაცხადა ქობალიამ.