შემოსავლების სამსახურმა გადასახადის გადამხდელთა საქმიანობის პრევენციის მიზნით, სამეწარმეო საქმიანობის ყალბი საგადასახადო დოკუმენტებით განმახორციელებელ პირთა სია გამოაქვეყნა. შავი სია, რომელიც 241 მეწარმისგან შედგება, შემოსავლების სამსახურის ვებ გვერდზე გამოქვეყნდა. ამ სიაში ჩამოთვლილი საწარმოების მიმართ აღძრულია სისხლის სამართლის საქმე ყალბი საგადასახადო დოკუმენტების დამზადების, გასაღების და გამოყენების ფაქტებზე.
შემოსავლების სამსახური ამ მონაცემების გამოქვეყნებით, გადამხდელებს აფრთხილებს, თავი შეიკავონ შავ სიაში მოხვედრილ ორგანიზაციებთან სამეწარმეო ურთიერთობის განხორციელებისაგან. იმ შეთხვევაში, თუ მეწარმე საკუთარ საქმიანობას შავ სიაში არსებულ სუბიექტებს დაუკავშირებს, შემოსავლების სამსახური განსაკუთრებული ყურადღებით დააკვირდება მეწარმის საქმიანობას.
თუ აქამდე მეწარმეს ჰქონდა კავშირი არაკეთილსინდისიერ გადამხდელებთან, შემოსავლების სამსახური გამოიკვლევს მათ საქმიანობას და მხოლოდ იმ შეთხვევაში მოახდენს რეაგირებას, თუ ეს საქმიანობა ყალბ დოკუმენტაციას ეფუძნებოდა.
