დღეს, 12:00 საათზე, საქართველოს ავტორთა საზოგადოების ხელმძღვანელი საქართველოში მოქმედი თეატრების ხელმძღვანელებს შეხვდება. შეხვედრა შეეხება თეატრებისათვის საავტორო უფლებებით სარგებლობის ახალი ტარიფების დაწესებას.
შეხვედრაზე გაიმართება პროგრამის პრეზენტაცია, რომელიც გულისხმობს სატარიფო პოლიტიკის რეფორმირებას, არსებული რეალობის გათვალისწინებით თეატრებისათვის საავტორო უფლებების გამოყენების ტარიფების დაწევას და მათ საერთაშორისო სტანდარტებთან შესაბამისობაში მოყვანას.
შეხვედრაზე ასევე იმსჯელებენ ავტორთა საზოგადოების მიერ თეატრების მიმართ აღძრული სასამართლო დავების დარეგულირებისა და მათი გადაწყვეტის გზებზე.
პროგრამის პრეზენტაციას გამართავენ საქართველოს ავტორთა საზოგადოების თავმჯდომარე გიგა კობალაძე და მისი მოადგილე თამარ კემულარია.
შეხვედრა გაიმართება ინტელექტუალური საკუთრების ეროვნული ცენტრის „საქპატენტის" შენობაში - მისამართი: რუსთაველის გამზ. #30 (ყოფილი იუსტიციის სამინისტროს შენობა, შესასვლელი გამზირის მხრიდან)