როგორც ცნობილია, 1-ელ ივლისს, 10:00 საათზე, "ბათუმის შერატონში" ''საქართველოს მეწარმეთა კონფედერაცია'' შავი და კასპიის ზღვების აუზის ქვეყნების ბიზნეს ასოციაციების კავშირის (UBCCE) ორდღიან ბიზნესფორუმს მასპინძლობს.

UBCCE აერთიანებს 16 ქვეყნის 19 ბიზნესორგანიზაციას და ყოველწლიური შეხვედრისთვის ირჩევს ერთ-ერთ წევრ ქვეყანას.

საქართველოში აღნიშნული ფორუმი პირველად ტარდება. მისი მიზანია რეგიონში ეკონომიკური კავშრების გააქტიურება და ჩამოსული სტუმრებისთვის საქართველოს ბიზნესშესაძლებლობების გაცნობა. შავი და კასპიის ზღვების ქვეყნების კომპანიებისა და ბიზნესასოციაციების წარმომადგენლები ადგილზე გაეცნობიან ქვეყანას და ექნებათ პირისპირ შეხვერდები ადგილობრივ კომპანიებთან.

ფორუმის პროგრამის ფარგლებში, ‘'საქართველოს მეწარმეთა კონფედერაციას'', თურქეთის ბიზნესასოციაცია TURKONFED-ს და საქართველოს ეროვნულ საინვესტიციო სააგენტოს შორის გაფორმდება ურთიერთგაგების მემორანდუმი, რომელიც ითვალისწინებს ქვეყნების შორის ინფორმაციის ურთიერთგაცვლას, ბიზნესკავშირების ხელშეწყობას, ერთობლივი გამოფენების, ფორუმების და ა. შ. ორგანიზებას. TURKONFED თურქეთის ერთ-ერთი გავლენიანი ბიზნესორგანიზაციაა და აერთიანებს ქვეყნის 2000-მდე მცირე და საშუალო საწარმოს.

ფორუმის პროგრამა ასევე დაეთმობა, გერმანიის საერთაშორისო განვითარების სააგენტო GIZ და UBCCE-ს ერთობლივი პროგრამის ფარგლებში, საქართველოში განახლებადი ენერგიის შესაძლებლობების სტრატეგიის განხილვას.

ბიზნესფორუმის მონაწილეები გაეცნობიან როგორც ქვეყნის პოტენციურ საინვესტიციო პროექტებს, ასევე საქართველოში ინვესტიციების განმახორციელებელი, მსოფლიოში ცნობილი კომპანიების: HiPP, Nurol, Heidelberg, RAKIA ფოთის ინდუსტრიული ზონა და ა.შ. გამოცდილებას.

ბიზნესფორუმს 16 წევრი სახელმწიფოს წარმომადგენელი დაესწრება, რომელთა შორისაა: თურქეთი, გერმანია, საბერძნეთი, აზერბაიჯანი, სომხეთი, უკრაინა, მოლდოვა, რუმინეთი, და ა.შ. ყველა დაინტერესებულ პირს შეუძლია გაიაროს რეგისტრაცია და მონაწილეობა მიიღოს ფორუმში.

"საქართველოს მეწარმეთა კონფედერაცია'' 2008 წელს დაარსდა, ამ დროიდან აქტიურად მუშაობს წევრი კომპანიების განვითარების და მათი ბიზნესკონტაქტების გაფართოების მიმართულებით. ‘'საქართველოს მეწარმეთა კონფედერაციის'' ინიციატივით, ბიზნესფორუმის ჩატარების ადგილად სპეციალურად შეირჩა აჭარა, როგორც ქვეყნის ეკონომიკური განვითარების ერთ-ერთი სტრატეგიული რეგიონი. ფორუმის ფარგლებში, აჭარაში დაიგეგმა მიმდინარე ინფრასტრუქტურული პროექტების და ასევე ფოთის თავისუფალი ინდუტსრიული ზონის დათვალიერება.