სურსათის მწარმოებელ საწარმოს მიერ რეკომენდაციის შეუსრულებლობაზე ჯარიმები გაიმიჯნა. გამიჯვნა მოხდა სურსათის/ცხოველის საკვების მწარმოებელ საწარმოს ან/და დისტრიბუტორის მიერ რეკომენდაციის შეუსრულებლობაზე "არაკრიტიკული" და "კრიტიკული" შეუსაბამობის მიხედვით. აღნიშნულთან დაკავშირებით პარლამენტმა "ადმინისტრაციულ სამართალდარღვევათა კოდექსში" ცვლილებები უკვე დაამტკიცა.
ახალი ნორმის თანახმად, "კრიტიკულ შეუსაბამობაში" იგულისხმება ადამიანის ჯანმრთელობისთვის საშიში ფაქტების აღმოჩენა, ხოლო "არაკრიტიკულ შეუსაბამობის" დროს უფრო ტექნიკური სახის დარღვევებზეა საუბარი, რომელიც ადამიანის ჯანმრთელობისა და სიცოცხლისთვის საფრთხეს არ შეიცვას.
მიღებული გადაწყვეტილების შესაბამისად, "არაკრიტიკული შეუსაბამობა" გამოიწვევს 400 ლარის ოდენობით დაჯარიმებას. იგივე ქმედება, ჩადენილი ხელმეორედ მიცემული გონივრული ვადის გასვლისას, გამოიწვევს დაჯარიმებას 1200 ლარის ოდენობით. "კრიტიკული შეუსაბამობა" კი დაჯარიმებას 1000 ლარის ოდენობით და საწარმოო პროცესის შეჩერებით კრიტიკული შეუსაბამობის გამოსწორებამდე.
ამასთან, თუ სურსათის ეროვნულ სააგენტოს უფლებამოსილ პირთან თანამშრომლობაზე უარის თქმა ან უფლებამოსილების შესრულების პროცესში მისთვის ხელის სხვაგვარად შეშლა მოხდა, ეს გამოიწვევს დაჯარიმებას 400 ლარის ოდენობით.
