ამერიკული კორპორაცია Apple დათანხმდა, საკუთარი ინტერნეტმაღაზიიდან App Store ამოეღო მობილური ტელეფონებისთვის განკუთვნილი პროგრამა ,,მესამე ინტიფადა".
iPad და iPhone-ისთვის განკუთვნილი ეს პროგრამა იყო უფასო და მომხმარებლებს აძლევდა იზრაელის წინააღმდეგ ბრძოლის შესახებ აზრების გაცვლის საშუალებას.
Apple-ის წარმომადგენლის განცხადებაში ნათქვამია, რომ პროგრამა ლახავს ადამიანთა დიდი ჯგუფის უფლებებს, რაც ეწინააღმდეგება კორპორაციის წესდებას.
ამ მოვლენებამდე იზრაელის ინფორმაციის მინისტრმა იული ედლშტეინმა წერილი გაუგზავნა ეფლის დამაარსებელ სტივ ჯობსს, სადაც მოითხოვდა ზემოხსენებული პროგრამის წაშლას კომპანიის ინტერნეტმაღაზიიდან, რადგან პროგრამა ატარებდა მკვეთრად ანტისემიტურ ხასიათს.
შეგახსენებთ: ინტიფადა ეწოდება პალესტინის სახალხო წინააღმდეგობას იზრაელის ოკუპაციის წინააღმდეგ და იზრაელ-პალესტინის კონფლიქტის ერთ-ერთი მნიშვნელოვანი ასპექტია.
პირველი ინტიფადა პალესტინელებსა და ისრაელელებს შორის 1987-იდან 1993 წლამდე (როცა ოსლოს შეთანხმებით პალესტინის ეროვნული მმართველობა ჩამოყალიბდა) მომხდარი ძალადობრივი ინციდენტების სერიაზე მიუთითებს. ამ მოვლენათა სერიას ხშირად ასევე „ქვათა ომს" უწოდებენ. მეორე ინტიფადა, ასევე ცნობილი, როგორც "ალ-აქსა ინტიფადა", გრძელდებოდა 2000-იდან 2005-ის დასაწყისის ჩათვლით.
