თბილისში შენობების რეაბილიტაციისას დამატებითი ფართის მიშენება შესაძლებელი ხდება. აღნიშნულთან დაკავშირებით ცვლილება შედის "სივრცითი მოწყობისა და ქალაქთმშენებლობის საფუძვლების შესახებ" კანონში.
კანონპროექტის თანახმად, თბილისის მთავრობა დედაქალაქში სარეაბილიტაციო არეალს განსაზღვრავს და რეაბილიტაციაში მონაწილეობის მიღების შესაძლებლობა, მისივე სტრუქტურულ ერთეულებს და ან მის მიერვე დაფუძნებული იურიდიულ პირს ექნება.
ასევე, სარეაბილიტაციო არეალში მდებარე თითოეული უძრავი ქონების განვითარება და ან რეაბილიტაცია კი შესაძლებელი იქნება დაფინანსდეს სახელმწიფო ბიუჯეტის, ადგილობრივი ბიუჯეტის, რეაბილიტაციის განმახორციელებელი სუბიექტის, მესაკუთრის და ან მესამე პირების სახსრებით.
პროექტით დგინდება, რომ თუ ხდება მრავალბინიანი სახლის განვითარება ანდა რეაბილიტაცია ისე, რომ მას დამატებითი ფართი არ ემატება, მაშინ ამხანაგობის თანხმობა საჭირო არ იქნება, ხოლო თუ შენობის საერთო ფართი 5 %-ზე მეტით იზრდება, ბინათმესაკუთრეთა ამხანაგობის თანხმობა იქნება საჭირო, რომლის კრებაზეც გადაწყვეტილება ხმათა უმრავლესობით მიიღება. იმ შემთხვევაში, თუ რეაბილიტირებული თუ განვითარებული შენობის საერთო ფართი 5%-ზე მეტით გაიზრდება, დამატებული ფართობი საკუთრებაში, რეაბილიტაციის განმახორციელებელ სუბიექტს გადაეცემა. ხოლო, თუ უძრავი ქონების მესაკუთრე გაზრდილი ფართობის აშენების დაფინანსებაში მიიღებს მონაწილეობას, მას ფართი გაწეული ხარჯების პროპორციულად დაუმტკიცდება.
სარეაბილიტაციო არეალში არამრავალბინიანი სახლების რეაბილიტაცია ხდება, მასზე 5%-მდე ფართის მიმატება, მესაკუთრის თანხმობის გარეშე იქნება შესაძლებელი და ის მესაკუთრესვე დარჩება, ხოლო 5%-ზე მეტი ფართის მიმატებისას კი მესაკუთრის თანხმობა აუცილებელი იქნება.
კანონპროექტის ავტორები და ინიციატორები დეპუტატები კახა ანჯაფარიძე და ანდრო ალავიძე არიან.