ყაზახურმა ავიაკომპანია "ეარ ასტანამ" სასტუმრო "რადისონში" რეგულარული რეისის ალმა ატა-თბილისი-ალმა ატას გახსნის პრეზენტაცია მოაწყო.
2 ივნისიდან თბილისის მიმართულებით პირველი რეისი ყაზახურმა ავიაკომპანიამ "ეარ ასტანამ" შეასრულა.
საქართველოს დედაქალაქიდან პირდაპირი რეისები ყაზახეთის სამხრეთ დედაქალაქში კვირაში სამჯერ განხორციელდება: ორშაბათობით, ხუთშაბათობით და შაბათობით.
რეისები Embraer E 190-ის ტიპის თვითმფრინავით სრულდება.
ავიაკომპანია მომხმარებლებს ასევე სთავაზობს ავია ბილეთებს ალმა ატის გავლით პეკინისმ დელისა და სამხრეთ-აღმოსავლეთ აზიის სხვა მიმართულებებით.
კომპანია Air Astana ყაზახეთის ნაციონალური გადამზიდავია და მსოფლიოს 44 მიმართულებით ახორციელებს რეისებს. მისი ავიაპარკი 24 ავიახომალდისგან შედგება.
"ტავ ჯორჯიას" ინფორმაცით, ისეთი რანგის ავიაკომპანიების შემოსვლა ქვეყნის ავიასივრცეში, როგორიც Air Astana უდიდესი მნიშვნელობის ფაქტია არა მარტო საქართველოს, არამედ მთლიანად კავკასიის რეგიონისთვის, გამომდინარე აღნიშნული ავიაკომპანიების მოცულობითა და მათი მრავალმილიონიანი გადაზიდვების რაოდენობით მსოფლიოს ავიაბაზარზე.
წლის დასაწყისიდან ამ დრომდე საქართველოს ავიაბაზარზე უკვე რიგით მესამე საერთაშორისო ავიაკომპანია შემოვიდა, რაც ნათელი დასტურია, რომ ტავ ჯორჯია ქმედით ღონისძიებებს ახორციელებს ახალი ავიაკომპანიების მოზიდვისა და მგზავრთა ნაკადის გაზრდის მიზნით.