დღეს, 16 მაისს, , 18:00 საათზე სასტუმრო „რედისონში" იუსტიციის სამინისტროს ახალი პროექტის _ იუსტიციის სახლის პრეზენტაცია გაიმართება.
როგორც "ჯი-ეი-ეიჩ-ენს" იუსტიციის სამინიტროდან აცნობეს, პრეზენტაციას დაესწრებიან საქართველოს პრემიერ-მინისტრი, მთავრობის წევრები, საქართველოში აკრედიტებული დიპლომატიური კორპუსისა და საერთაშორისო ორგანიზაციების, მედიის წარმომადგენლები.
იუსტიციის სახლი არის იუსტიციის სამინისტროს სერვისების სრულიად ახალი კონცეფციის მქონე საჯარო დაწესებულება. ეს არის სახელმწიფო მომსახურების განსხვავებული სტრატეგია, მომხმარებელზე მაქსიმალურად ორიენტირებული და ბიზნეს ლოგიკით აწყობილი, ერთ კონცეფციაში გაერთიანებული სერვისები. იუსტიციის სახლში სხვადასხვა სტრუქტურის სერვისების მიღება მოქალაქეებისათვის ერთი ფანჯრის პინციპითაა შესაძლებელი. აქ მომხმარებელს შეუძლია, ერთდროულად მიიღოს სამოქალაქო რეესტრის სააგენტოს, საჯარო რეესტრის ეროვნული სააგენტოს, ეროვნული არქივის, აღსრულების ეროვნული ბიუროს, ნოტარიუსთა პალატის; საკანონმდებლო მაცნეს, იუსტიციის სასწავლო ცენტრის სერვისები.
იუსტიციის სახლი არ გულისხმობს ერთ შენობაში რამდენიმე დამოუკიდებელი სტრუქტურული ერთეულის მექანიკურ გადატანას. მისი ამოცანაა მომსახურებაზე ორიენტირებული ყველა სტრუქტურის იდეური და სისტემური გაერთიანება. სერვისების დარბაზი დაყოფილია თვითმომსახურების, სწრაფი და ხანგრძლივი მომსახურების სივრცეებად.
იუსტიციის სახლის გარემო მყუდრო, სასიამოვნო და კომფორტული იქნება. მაღალკვალიფიციური, კომპეტენტური და კეთილგანწყობილი პერსონალი მომხმარებლთა თავაზიან, სწრაფ და ხარისხიან მომსახურებას უზრუნველყოფს.
საქართველოში პირველი იუსტიციის სახლი ბათუმში მაისის ბოლოს გაიხსნება. მიმდინარე წელს იგეგმება იუსტიციის სახლების გახსნა რუსთავში, ქუთაისში, მესტიაში. თბილისში კი ის 2012 წლიდან ამოქმედდება.
