საქართველოს შოთა რუსთაველის თეატრისა და კინოს სახელმწიფო უნივერსიტეტის ორგანიზებით, თბილისის საერთაშორისო სტუდენტური კინოფესტივალი „ამირანი", წელს 17-21 მაისს გაიმართება.
სელექციის შედეგად, ფესტივალის ძირითად საკონკურსო პროგრამაში მოხვდა კინოსკოლების ნამუშევრები შემდეგი ქვეყნებიდან: აშშ, გერმანია, თურქეთი, უკრაინა, ესპანეთი, პორტუგალია, სლოვაკეთი, ლატვია, ბულგარეთი, ლიტვა, სომხეთი, უკრაინა, აზერბაიჯანი, სამხრეთ აფრიკა, ირანი, საფრანგეთის, პოლონეთი, რუსეთი და საქართველო - ჯამში, 19 ქვეყნის სხვა და სხვა კინოსკოლის სტუდენტური ნამუშევრებიდან გამოვლინდებიან გამარჯვებულები.
2011 წლიდან „ამირანით" მხოლოდ 4 ფილმი დაჯილდოვდება:
საუკეთესო მხატვრული ფილმი
საუკეთესო დოკუმენტური ფილმი
საუკეთესო ანიმაციური ან ექსპერიმენტული ფილმი
და გაიცემა ჟიურის პრიზი.
ამ ოთხი ნომინაციის გარდა, სპეციალური დიპლომებით აღინიშნებიან სტუდენტები იმ სპეციალობების მიხედვით, რომელსაც ეუფლებიან მსოფლიოს ყველა კინოსკოლაში - რეჟისურა, ოპერატორის ნამუშევარი, ხმა, მონტაჟი და სტუდენტ კრიტიკოსთა არჩევანი.
17 მაისს, ფესტივალის გახსნის საღამოზე ნაჩვენები იქნება დათო თაყაიშვილის სტუდენტური ანიმაციური ფილმი „ჭირი", რომელიც კანის ფესტივალის 1984 წლის პრიზიორია. ასევე, გაიმართება „კინომუსიკის" საღამო, რომელსაც დათო ევგენიძე უხელმძღვანელებს.
წელს, ფესტივალის საერთაშორისო ჟიურის წევრები არიან: ბოგდან ძივორსკი - პოლონეთი, ინეკე სმიტსი - ნიდერლანდები, დოვერ ქოსაშვილი - ისრაელი, ანდრეა ვინკი - გერმანია და მარინა კერესელიძე - საქართველო.
ტრადიციისამებრ, ჟიურის ყველა წევრი მასტერკლასს/პრეზენტაციას ჩაატარებს ან საინფორმაციო შეხვედრას გამართავს სტუდენტებთან.
18 მაისს ფესტივალის სამუშაო დღე, პოლონელი ბოგდან ძივორსკის მასტერკლასით დაიწყება. იგიმავე საღამოს,18:00 საათზე ფრანგული ინსტიტუტის მხარდაჭერით ცნობილი ფრანგი რეჟისორის, ფრანსუა ოზონის, როგორც ახალბედა რეჟისორის, ფილმების ჩვენება მოეწყობა და წვეულება გაიმართება.
19 მაისს ისრაელის საელჩოს მხარდაჭერით ჟიურის წევრი დოვერ ქოსაშვილი რეჟისურის მასტერკლასს ჩაატარებს და თავის ახალ ფილმს წარუდგენს ფესტივალის სტუმრებს, ხოლო თელ-ავივის უნივერსიტეტის კინო-ტელე ფაკულტეტის წარმომადგენელი ჰელენ იანოვსკი, თავისი კინოსკოლის სტუდენტების ფილმების პრეზენტაცია-ჩვენებას წარუძღვება.
19 მაისს, გოეთეს ინსტიტუტში - ანდრეა ვინკი, ფესტივალ goEast-ს წარადგენს. ასევე, გაიმართება გერმანიის NEXT GENERATION ფილმების პრეზენტაცია-ჩვენება, რომელსაც ახალგაზრდა გერანელი რეჟისორი ინგო ბირმანი წარუძღვება.
20 მაისს შვეიცარიის საელჩოს მხარდაჭერით ჟენევის ხელოვნებისა და დიზაინის აკადემიის კინო ფაკუტეტის ხელმძღვანელი ჟან პერრე გამართავს ჟან ჟაკ რუსოსადმი მიძღვნილ საერთაშორისო პროექტის პრეზენტაციას, რომელშიც თეატრისა და კინოს უნივერსიტეტის სტუდენტებსაც შეუძლიათ მონაწილეობის მიღება.
საქართველოს კინემატოგრაფიის ეროვნული ცენტრის მხარდაჭერით, პირველად ფესტივალის არსებობის მანძილზე, შედგება სტუდენტური ურთიერთთანამშრომლობა. სელექციის შედეგად, მსოფლიოს სხვა ქვეყნიდან ფესტივალზე მოწვეული 15 სტუდენტი, რამდენიმე შერეულ ჯგუფად ჩამოყალიბდება, რომელიც ONE SHOT MOVIE-ს პრინციპით გადაიღებს ფილმებს - კო-პროდუქციას. შემდგომში, შესაძლებელი იქნება „ამირანის" სახელით ამ ფილმების სხვადასხვა ფესტივალებზე გატანა, რაც ფესტივალს კიდევ უფრო მეტ მნიშვნელობას შესძენს საერთაშორისო მასტაბით.
წლევანდელი ფესტივალი განახლებული სახით წარსდგა საზოგადოების წინაშე - ახალი ლოგო და ანიმაცია - თეატრისა და კინოს სახელმწიფო უნივერსიტეტის პირველკურსელი ანიმატორების, თეა ვაწაძისა და ნიკოლოზ გელაშვილის შემოქმედებაა.
ფესტივალი 20 მაისს დაიხურება, გამოვლინდებიან გამარჯვებულები, მოეწყობა წვეულება. ხოლო 21 მაისს, არასაკონკურსო ჩვენებები გაიმართება.
ფესტივალის მხარდამჭერები არიან ქალაქ თბილისის მერია, საქართველოს კინემატოგრაფიის ეროვნული ცენტრი, სამოქალაქო ინსტიტუციონალიზმის განვითარების ფონდი, ფრანგული ინსტიტუტი, ისრაელის საელჩო, გოეთეს ინსტიტუტი, შვეიცარიის საელჩო, ფონდები „ცის ხიდი" და „ტატო".
ფესტივალის პარტნიორები არიან „თიბისი ბანკი", „კაუკაზუს ონლაინი", „აი სი ჯგუფი", „კაპაროლი", „ასკანელი ძმები", „სარაჯიშვილი", „ნაბეღლავი", ყავა „პელე" და ჩაი „გურიელი", კომპლექსი „ქალაქური" და ლიტ-კაფე „ქარავანი".
ფესტივალის მედია პარტნიორები არიან: ჟურნალი „FOCUS", გაზეთები „24 საათი", "GEORGIA TODAY" და „რეზონანსი", საინფორმაციო სააგენტოები „GHN" და „IPN", რადიოები „უცნობი", „მუზა" და „რადიოქალაქი", ტელეკომპანიები „რუსთავი 2" და „იმედი".
