"თავისუფლების ქარტია" ამოქმედებიდან 6 თვის განმავლობაში პირები, რომლებიც საიდუმლოდ თანამშრომლობდნენ სპეცსამსახურებთან, მოვალენი არიან წერილობით მიმართონ სახელმწიფო კომისიას და გადასცენ მას მათ ხელთ არსებული ყველა ინფორმაცია.
აღნიშნულ ვალდებულებას "თავისუფლების ქარტიის" პროექტი ითვალისწინებს, რომელსაც პარლამენტი მიმდინარე თვეში მესამე მოსმენით დაამტკიცებს.
კანონპროექტის თანახმად, პირები, რომლებიც საიდუმლოდ თანამშრომლობდნენ სპეცსამსახურებთან, მოვალენი არიან ამ კანონის ამოქმედებიდან 6 თვის ვადაში წერილობით მიმართონ სახელმწიფო კომისიას და გადასცენ მას მათ ხელთ არსებული ყველა ინფორმაცია და დოკუმენტი სპეცსამსახურში მათი საქმიანობის, აგრეთვე სპეცსამსახურის საქმიანობის შესახებ.
ასევე, წერილობით განცხადებაში მითითებული უნდა იყოს პირის ვინაობა, სპეცსამსახურებთან თანამშრომლობის ფორმა, ადგილი და პერიოდი, აგრეთვე სხვა მონაცემები, რომელსაც მოითხოვს სახელმწიფო კომისია.
თუ კომისია საჭიროდ ჩათვლის, პირი ვალდებულია გამოცხადდეს სახელმწიფო კომისიის სხდომაზე და მისცეს მას ზეპირი განმარტება.
განცხადების შეტანის დროს პირი წერილობით იღებს გაფრთხილებას ამ კანონით და სისხლის სამართლის კოდექსით გათვალისწინებული პასუხისმგებლობის შესახებ, საკუთარი ან სხვათა საქმიანობის შესახებ არასწორი ინფორმაციის მიწოდების გამო.
ამასთან, იმ პირის შესახებ მონაცემების გახმაურება, რომელიც საიდუმლოდ თანამშრომლობდა სპეცსამსახურებთან და ამის შესახებ განაცხადა ნებაყოფლობით, ისჯება სისხლის სამართლის კანონმდებლობით დადგენილი წესით. ასევე სისხლის სამართლებრივი პასუხისმგებლობა ეკისრება პირს, რომელიც სახელმწიფო კომისიას განზრახ მიაწოდებს არასწორ ინფორმაციას.
