Schweitzer Engineering Laboratories, INC 500-კილოვოლტიან ელექტროგამდაცემ ხაზებზე სასისტემო ავტომატიკას დაამონტაჟებს.
ამ ეტაპზე ქვეყნის ენერგოსისტემა მნიშვნელოვნად არის დამოკიდებული 500-კილოვოლტიანი ელექტროგამდაცემი ხაზების გამართულ მუშაობაზე. საუბარია "იმერეთი", "ქართლი 1,2"-ზე. შარშან ზაფხულის პერიოდში რამდენჯერმე მოხდა სასისტემო ავარია, რაც იწვევდა ქვეყნის ენერგოსისტემის ორად გაყოფას ან სრულ ჩაქრობას. წელს მსგავსი ავარიების თავიდან ასაცილებლად, სსე-მ ჩაატარა ტენდერი და ხელშეკრულება გააფორმა ამერიკულ კომპანაისთან Schweitzer Engineering Laboratories, INC., რომელიც დაამონტაჟებს სასისტემო ავტომატიკას მაღალი ძაბვის 500-კილოვოლტიან ელექტროგამდაცემ ხაზებზე.
"ეს სასისტემო ავტომატიკა შესაძლებლობას მოგვცემს, ავარიის შემთხვევაში თავიდან იქნას აცილებული გამორთვების ჯაჭვური რეაქცია, არ მოხდეს სისტემური ავარიები, არ შეუწყდეს ელექტროენერგიის მიწოდება სასიცოცხლო დანიშნულების ობიექტებს და არ მოხდეს ქვეყნის სრული ჩაქრობა", - განაცხადა სსე-ის რეაბილიტაციის მმართველმა, სულხან ზუმბურიძემ.
სსე-ის ინფორმაციით, ეს მოწყობილობები უკვე წელს, ზაფხულის პერიოდში დამონტაჟდება ელექტროგადამცემ ხაზებზე.