ბათუმის მერიამ ურჩი მოვაჭრეების დაჯარიმებასთან დაკავშირებით კანონპროექტი უკან გაიწვია.
როგორც დღევანდელ ბიუროს სხდომაზე საფინანსო-საბიუჯეტო კომიტეტის თავმჯდომარემ ზურაბ მელიქიშვილმა აღნიშნა, კანონპროექტთან დაკავშირებით კონსულტაციები მის ინიციატორებთან გაიმართა და რადგან საკანონმდებლო ინიციატივა ბუნდოვნად იკითხებოდა და ამიტომ მისი განხილვა შეჩერდა.
"მინდა ყველა დაინტერესებულ მხარეს ვაცნობო, რომ საქართველოს პარლამენტი ამ კანონპროექტს არ განიხილავს და საკითხი მთლიანად დახურულია", - აღნიშნა მელიქიშვილმა.
ბათუმის მერიის მიერ მომზადებული კანონპროექტი კი ურჩ გარემოვაჭრეებს 10 ლარიანი ჯარიმის შემოღებას ითვალისწინებდა.
აღნიშნულთან დაკავშირებით ცვლილება უნდა შესულიყო "ადმინისტრაციულ სამართალდარღვევათა კოდექსში", რომლის მიხედვითაც გარემოვაჭრე ფიზიკურ პირს 10 ლარით დაჯარიმდებოდნენ, თუ ის შესაბამისი უფლების მიმნიჭებელი აქტის მოთხოვნათა დარღვევით საქმიანობს. იმ შემთხვევაში თუ გარევაჭრობაზე მოთხოვნებს იურიდიული პირი არ ასრულებს, ის 25 ლარით დაჯარიმდებოდა.
ამასთან, კანონპროექტის მიხედვით, ბაზრის ან ბაზრობის მოწყობა თვითმმართველი ერთეულის მიერ დადგენილი წესის დარღვევით, ფიზიკური პირის 100 ლარით, იურიდიული პირების კი 200 ლარით დაჯარიმებას გამოიწვევდა. ამავე პროექტით, თვითმმართველი ერთეულის მიერ დადგენილი წესის მოთხოვნებთან შესაბამისობაში ბაზრის მოყვანის თაობაზე, თვითმმართველი ერთეულის მოთხოვნის შეუსრულებლობა, ფიზიკური პირის 500 ლარით, ხოლო იურიდიული პირის 100 ლარის ოდენობით დაჯარიმებას იწვევდა.
