ევროკომისია და უკრაინა 2027 წლისთვის ევროკავშირის 90-მილიარდიანი ფინანსური პაკეტიდან გათვალისწინებული 45 მილიარდი ევროს სწრაფად გამოყოფის პროცესის დაჩქარებაზე შეთანხმდნენ.
ამის შესახებ აღნიშნულია ევროკომისიისა და უკრაინის ერთობლივ განცხადებაში. ინფორმაციას POLITICO ავრცელებს.
„2027 წლისთვის ჩვენ შევთანხმდით, რომ უკრაინის მხარდაჭერის სესხის ფარგლებში გათვალისწინებული 45 მილიარდი ევროს გამოყოფაზე სწრაფად გადავიდეთ“, - ნათქვამია ევროკომისიისა და უკრაინის ერთობლივ განცხადებაში.
თანხის გამოყოფა გარკვეული პირობების შესრულებაზეა დამოკიდებული, მათ შორის უკრაინის მიერ ევროკავშირთან შეთანხმებული რეფორმების განხორციელებაზე. ევროკავშირის მაღალი რანგის წარმომადგენლის განცხადებით, პირობების შესრულების შემდეგ თანხის გაცემა დაუყოვნებლივ მოხდება.
ამასთან, ევროკავშირმა და უკრაინამ განაცხადეს, რომ დაიწყებენ მუშაობას უკრაინის დამატებითი საბიუჯეტო და თავდაცვის საჭიროებების განსაზღვრაზე და ამ საკითხის კოორდინაციის მიზნით ყოველთვიურ შეხვედრებს გამართავენ.
90-მილიარდიანი სესხი უკრაინის დასახმარებლად 2026-2027 წლებისთვისაა გათვალისწინებული. პაკეტიდან დაახლოებით 60 მილიარდი ევრო უკრაინის თავდაცვის შესაძლებლობების გაძლიერებასა და თავდაცვის პროდუქციის შესყიდვას მოხმარდება, ხოლო 30 მილიარდი - საბიუჯეტო მხარდაჭერას.
ევროკომისიისა და უკრაინის შეთანხმება მას შემდეგ გაფორმდა, რაც კიევი 2026 წლის დარჩენილი პერიოდისა და 2027 წლის დასაწყისისთვის დაფინანსების დეფიციტის დაფარვის საკითხზე ევროკავშირთან მოლაპარაკებებს აწარმოებდა. Reuters-ის ცნობით, უკრაინას 2026 წლის თავდაცვის ხარჯების დასაფინანსებლად დაახლოებით 27 მილიარდი დოლარის დეფიციტი აქვს.
