უკრაინის პრეზიდენტი ვოლოდიმირ ზელენსკი აცხადებს, რომ მომდევნო კვირაში სამშვიდობო პროცესის შუამავლებთან ახალი კონტაქტები გაიმართება, ასევე ახალი მოლაპარაკებები შედგება საჰაერო თავდაცვის საშუალებების მიწოდების საკითხზე.
„გვექნება ახალი კონტაქტები შუამავლებთან - სწორედ იმ ნაბიჯებსა და წინადადებებთან დაკავშირებით, რომლებიც აუცილებელია. უკრაინა დიპლომატიაში ყოველთვის აქტიურია.
იქნება ახალი კონტაქტები საჰაერო თავდაცვის პაკეტებთან დაკავშირებით ჩვენი სახელმწიფოსა და ჩვენი ხალხის დასაცავად“, - განაცხადა ზელენსკიმ.
უკრაინის პრეზიდენტმა აღნიშნა, რომ კვირას მოისმინა პრემიერ-მინისტრ სერჰი კორეცკის ანგარიშები და ასევე ესაუბრა უკრაინის შეიარაღებული ძალების მთავარსარდალ მიხაილო დრაპატის, უკრაინის ქალაქების დაცვისა და რუსეთის წინააღმდეგ საპასუხო ზომების შესახებ.
„არსებობს სრულიად ადეკვატური პასუხები, რუსეთის თითოეულ დარტყმას ჩვენი რეაქცია მოჰყვება. რუსეთის ომი სულ უფრო მეტად იქნება საგრძნობი მათივე სახლში - რუსეთში," - განაცხადა პრეზიდენტმა.
„მადლობას ვუხდი შეიარაღებულ ძალებსა და უკრაინის უსაფრთხოების სამსახურს: გრძელდება ოპერაცია რუსეთის ნავთობგადამამუშავებელ საწარმოებზე დარტყმების განსახორციელებლად - ეს მათთვის ძალიან საგრძნობია, ასევე განხორციელდა დარტყმები რუსეთის საზენიტო-სარაკეტო კომპლექსებსა და რადიოლოკაციურ სადგურებზე. იყო ჩვენი საპასუხო დარტყმებიც რუსეთის ინფრასტრუქტურაზე აზოვისა და შავი ზღვის რეგიონებში.
ერთადერთი მიზეზი, რის გამოც ეს ყველაფერი ჯერ კიდევ გრძელდება, არის რუსეთის სურვილის არქონა, დაასრულოს ეს ომი“, - განაცხადა ზელენსკიმ.
