ამერიკის დაზვერვის შეფასებით, გერმანიაში აღმოჩენილი ასაფეთქებელი მოწყობილობით აღჭურვილი დრონი, სავარაუდოდ, რუსეთის ხელისუფლებასთან არის დაკავშირებული. ამის შესახებ The Wall Street Journal წერს.
დრონი სამშაბათს საღამოს ლაიფციგის აეროპორტის ტერიტორიაზე შენიშნეს. ის უკრაინული სატვირთო თვითმფრინავის მახლობლად, შეზღუდულ ზონაში ფიქსირდებოდა. დრონის აღმოჩენის შემდეგ ღამით აეროპორტი დაიკეტა. გერმანული მედიის ცნობით, დრონზე დამონტაჟებული ასაფეთქებელი მოწყობილობა, არ ამოქმედებულა.
გამომძიებლები აეროპორტში მომხდარ კიდევ ერთ ინციდენტსაც იკვლევენ. მას შემდეგ, რაც ლაიფციგის აეროპორტის დაკეტვის გამო თვითმფრინავმა დაშვება შეწყვიტა, ის ამოუცნობ ობიექტს შეეჯახა. თვითმფრინავი მსუბუქად დაზიანდა, თუმცა სხვა აეროპორტში უსაფრთხოდ დაეშვა.
გერმანიის შინაგან საქმეთა მინისტრმა ალექსანდერ დობრინდტმა განაცხადა, რომ აეროპორტების მიმდებარე ტერიტორიაზე დრონების გამოჩენა თავისთავად ახალი მოვლენა არ არის. თუმცა, მისი თქმით, ასაფეთქებელი ნივთიერებით აღჭურვილი დრონის აღმოჩენა „საფრთხის ახალ დონეს“ წარმოადგენს.
დობრინდტის განცხადებით, გამოძიებამ უნდა დაადგინოს, შესაძლოა თუ არა ინციდენტების უკან უცხო სახელმწიფოები იდგნენ. მინისტრს შესაძლო დამნაშავედ რუსეთი არ დაუსახელებია. თუმცა დასავლეთის უსაფრთხოების სამსახურების წარმომადგენლები ბოლო თვეების განმავლობაში არაერთხელ აცხადებდნენ, რომ ეჭვი აქვთ მოსკოვის მონაწილეობაზე ევროპული ინფრასტრუქტურის მუშაობის შეფერხების მცდელობებში.
