რუსეთის საჰაერო-კოსმოსური ძალების მთავარსარდლის, გენერალ ალექსანდრ ჩაიკოს კიდევ ერთი ნათესავი მოსკოვის რესტორანში მომხდარი აფეთქების შედეგად გარდაიცვალა.
მედიის ცნობით, 30 წლის იულია კირილოვა დანიილ კირილოვის მეუღლე იყო, რომელიც გენერალ ჩაიკოს მეუღლის ძმისშვილია.
გამოცემა „ვერსტკას“ ინფორმაციით, ქალი 4 აგვისტოს, კუდრინსკის მოედანზე მდებარე იტალიურ რესტორან Balzi Rossi-ში აფეთქებიდან სამი დღის შემდეგ გარდაიცვალა .
ინციდენტის დღეს სამართალდამცავებთან დაკავშირებულმა Telegram-არხებმა დაშავებულთა სიები გამოაქვეყნეს, სადაც „30 წლის იულია ვ.“ იყო მითითებული. „ვერსტკამ“ დაადგინა, რომ კირილოვას ივლისში 30 წელი შეუსრულდა, ხოლო გვარში მითითებული „ვ.“ მისი მამის სახელის პირველი ასოა.
„ვერსტკას“ ცნობით, 8 აგვისტოს მდგომარეობით დადგენილია ჩაიკოს ექვსი ნათესავისა და ნაცნობის ვინაობა, რომლებიც აფეთქების დროს რესტორანში იმყოფებოდნენ.
კირილოვას გარდა, აფეთქების შედეგად შდაიღუპნენ ჩაიკოს სიძე დანიილ პერდრი და რუსეთის შეიარაღებული ძალების გენერალ-მაიორი ვალერი პლოხოტნიუკი.
დაშავდნენ ასევე გენერლის ქალიშვილი მარია პერდრია, მისი დისშვილი ევდოკია კირილოვა და მძახალი ალექსანდრ პერდრი.
მოსკოვის კუდრინსკის მოედანზე რესტორან Balzi Rossi-ში, აფეთქება 1 აგვისტოს საღამოს მოხდა. ინციდენტის შესახებ ოფიციალური ინფორმაცია თითქმის არ არსებობს, გარდა რუსეთის ეროვნული ანტიტერორისტული კომიტეტის განცხადებისა ბომბის აფეთქების შესახებ. მოსკოვის მერმა, სერგეი სობიანინიმა, მომხდარს ტერორისტული აქტი უწოდა.
ოფიციალური ინფორმაციით, რესტორანში რუსეთის საჰაერო-კოსმოსური ძალების მთავარსარდლის, ალექსანდრ ჩაიკოს, 55 წლის იუბილეს აღსანიშნავი წვეულება იმართებოდა. დაიღუპა სულ მცირე 5 ადამიანი, კიდევ 19 დაშავდა. ჩაიკო რუსეთის საჰაერო-კოსმოსური ძალების მთავარსარდლად 2026 წლის მაისში დაინიშნა.
უკრაინაში რუსეთის სრულმასშტაბიანი შეჭრის დაწყებისას ჩაიკო აღმოსავლეთის სამხედრო ოლქსა და „აღმოსავლეთის“ ჯარების დაჯგუფებას ხელმძღვანელობდა, რომლებმაც ბელარუსის მხრიდან კიევზე შეტევა დაიწყეს.
მიმდინარე წლის მარტში ევროკავშირმა ჩაიკოს პერსონალური სანქციები დაუწესა, როგორც ბუჩაში მშვიდობიანი მოსახლეობის მასობრივ მკვლელობებზე პასუხისმგებელ ერთ-ერთ პირს.
