რუსეთის საგარეო საქმეთა სამინისტრო 2028 წლის რუსეთ-საქართველოს ომთან დაკავშირებით განცხადებას ავრცელებს, რომელშიც აღნიშნულია, რომ თითქოსდა დასავლეთი, კიევი და ქართული რადიკალური ძალები ცდილობენ თბილისი სამხრეთ კავკასიაში ახალ სისხლიან ავანტიურებში ჩაითრიონ
"ველით, რომ რაც შეიძლება მალე დაიწყება პრაქტიკული მუშაობა თბილისს, ერთი მხრივ, და სოხუმსა და ცხინვალს, მეორე მხრივ, შორის ძალის გამოუყენებლობის შესახებ შეთანხმების შემუშავებასა და ხელმოწერაზე.
ასეთი სამართლებრივი ვალდებულებების აღება 2008 წლის აგვისტოს ტრაგიკული მოვლენების განმეორებისგან საიმედო გარანტია იქნება. სასაზღვრო რაიონებში ვითარების სტაბილიზაციაში რეალური წვლილი უნდა გახდეს ქართულ-ოსური და ქართულ-აფხაზური სახელმწიფო საზღვრების დელიმიტაციის პროცესის დაწყება, რასაც მათი შემდგომი დემარკაცია უნდა მოჰყვეს.
ეს ამოცანები განსაკუთრებულ მნიშვნელობას იძენს „დასავლელების“, კიევის ნაცისტური რეჟიმისა და ქართული რადიკალური პოლიტიკური ძალების მცდელობების ფონზე, თბილისი სამხრეთ კავკასიაში ახალ სისხლიან ავანტიურებში ჩაითრიონ.
მოსკოვში ვაფიქსირებთ, რომ ქართულ საზოგადოებაში გრძელდება 2008 წლის აგვისტოს მოვლენების გადააზრების მცდელობები. ამასთან, საფუძვლიანად მიგვაჩნია მიხეილ სააკაშვილის რეჟიმისთვის შეიარაღებული კონფლიქტის გაჩაღებაზე სრული პასუხისმგებლობის დაკისრება.
ვაფიქსირებთ საქართველოს ხელისუფლების განცხადებებს აფხაზებთან და სამხრეთ ოსებთან შერიგების აუცილებლობის შესახებ, რაც გვაძლევს იმედს, რომ მიდგომების აღნიშნული ტრანსფორმაცია მხოლოდ დეკლარაციად არ დარჩება და აფხაზეთთან და სამხრეთ ოსეთთან ურთიერთობების მოწესრიგების კონკრეტული პრაქტიკული ნაბიჯებით იქნება გამყარებული.
რუსეთის მხარე მზადაა, მომავალშიც ყოვლისმომცველი დახმარება გაუწიოს მხარეებს მოლაპარაკებების პროცესის წინსვლაში, ნდობის განმტკიცებასა და სახელმწიფოთაშორისი ურთიერთობების ჩამოყალიბებაში, სამხრეთ კავკასიაში სტაბილურობისა და უსაფრთხოების ინტერესებიდან გამომდინარე", - აცხადებს რუსეთის საგარეო უწყება.
