უკრაინის საჰაერო სივრცეში რუსული რაკეტების ჩამოგდების საკითხი, ვიდრე ისინი პოლონეთის საზღვრებს მიუახლოვდებოდნენ, სერიოზულ და პროფესიულ განხილვას საჭიროებს. ამის შესახებ პოლონეთის საგარეო საქმეთა მინისტრმა რადოსლავ სიკორსკიმ განაცხადა.
„საკითხი, შეგვიძლია თუ არა დარწმუნებული ვიყოთ, რომ უკეთესი იქნებოდა ამ რუსული რაკეტების უკრაინის თავზე ჩამოგდება და არა მოგვიანებით - პოლონეთის თავზე, ძალიან სერიოზული დისკუსიის საგანია და ის პარტიული დაპირისპირების მძევალი არ უნდა გახდეს“, - განაცხადა სიკორსკიმ.
პოლონეთის საგარეო საქმეთა მინისტრმა აღნიშნა, რომ უკრაინა უკვე რამდენიმე დღეა ბალისტიკური რაკეტებით იბომბება, რომელთა წინააღმდეგაც ამ ეტაპზე ეფექტიანი დაცვა არ არსებობს, რაც მშვიდობიან მოსახლეობაში მსხვერპლის ზრდას იწვევს.
მისი თქმით, სწორედ ამიტომ საჭიროა დეტალურად შეფასდეს საჰაერო სამიზნეების განადგურების შესაძლებლობა ჯერ კიდევ მანამდე, ვიდრე ისინი ნატო-ს ტერიტორიას მიუახლოვდებიან.
