Politico-ის ინფორმაციით, აშშ-სა და უკრაინას შორის სადაზვერვო ინფორმაციის გაცვლა კვლავ იმ მაღალ დონეს დაუბრუნდა, რომელიც ადრე არსებობდა.
გამოცემა, რომელიც უკრაინაში მიმდინარე მოვლენების დიდი ხნის დამკვირვებელ ექსპერტებს ეყრდნობა, წერს, რომ ეს „დიდი ხნის ნანატრი პოზიტიური იმპულსია უკრაინის სამხედრო ძალისხმევისთვის კრიტიკულად მნიშვნელოვან პერიოდში“.
სენატორმა მარკ უორნერმა, რომელიც სენატის დაზვერვის კომიტეტის წამყვანი დემოკრატი წევრია და უკრაინისთვის ამერიკული დახმარების დიდი ხნის მხარდამჭერია, განაცხადა, რომ ხედავს აშშ-სა და უკრაინას შორის სადაზვერვო ინფორმაციის გაცვლის გაუმჯობესების ნიშნებს. მისი შეფასებით, ამან კიევს ოთხწლიან ომში მნიშვნელოვანი უპირატესობის მოპოვებაში შეუწყო ხელი.
„დეტალებში არ შევალ, მაგრამ სიტუაცია გაუმჯობესდა“, - განაცხადა უორნერმა. მისი თქმით, უკრაინის მიერ შორი მოქმედების რაკეტებისა და დრონების გამოყენებამ შესაძლებელი გახადა რუსეთის ტერიტორიის სიღრმეში დარტყმების განხორციელება და უკრაინის პოზიციების გამყარება.
ამ შეფასებას დაეთანხმნენ რესპუბლიკელი სენატორები ჯონ კორნინი, რომელიც ასევე სენატის დაზვერვის კომიტეტის წევრია, და როჯერ უიკერი, რომელიც სენატის შეიარაღებული ძალების კომიტეტს ხელმძღვანელობს. მათი თქმით, აშშ-სა და უკრაინას შორის სადაზვერვო ინფორმაციის გაცვლა ამ სტრატეგიულად მნიშვნელოვან პერიოდში მნიშვნელოვნად გაძლიერდა.
Politico-ის ინფორმაციით, რუსეთმა აშშ-ს შესთავაზა შეთანხმება, რომლის მიხედვითაც კრემლი ირანისთვის სადაზვერვო ინფორმაციის გადაცემას შეწყვეტდა, თუ ვაშინგტონი უკრაინისთვის სადაზვერვო მონაცემების მიწოდებას შეწყვეტდა.
გამოცემის ცნობით, აპრილში გავრცელდა ინფორმაცია, რომ რუსეთის აღმოსავლეთსა და სამხრეთში შეტევის გაძლიერების ფონზე, შეერთებულმა შტატებმა უკრაინასთან სადაზვერვო ინფორმაციის გაზიარებაზე დაწესებული ზოგიერთი შეზღუდვა მოხსნა.
