უკრაინის თავდაცვის ყოფილმა მინისტრმა მიხაილო ფედოროვმა, უკრაინის პრეზიდენტის მიერ შეთავაზებულ თანამდებობებთან დაკავშირებით განაცხადა, რომ თავდაცვის მინისტრის პოსტის გარდა სხვა არცერთ თანამდებობას არ დათანხმდება.
„მადლობელი ვარ პრეზიდენტის ყველა შემოთავაზებული ვარიანტისთვის. თუმცა, დღეს სახელმწიფოში, ფრონტზე მებრძოლი სამხედროების გარდა, ომის მიმდინარეობას რეალურად მხოლოდ სამი თანამდებობა განსაზღვრავს - უკრაინის პრეზიდენტი, თავდაცვის მინისტრი და უკრაინის შეიარაღებული ძალების მთავარსარდალი.
სწორედ ამიტომ, თავდაცვის მინისტრის თანამდებობის გარდა, სხვა არცერთ პოსტს არ დავთანხმდები.
არცერთ სხვა თანამდებობას არ აქვს რეალური უფლებამოსილება, რომ შეებრძოლოს შესყიდვებში არსებულ კორუფციას, დაასრულოს არმიის დაწყებული ტრანსფორმაცია, დაგეგმოს და განახორციელოს მტრის წინააღმდეგ ასიმეტრიული მოქმედებები და ოპერაციები, აღმოფხვრას სისტემაში დამკვიდრებული ტყუილისა და უპასუხისმგებლობის კულტურა და ბოლომდე მიიყვანოს სხვა საქმეები, რომლებიც ჩვენმა გუნდმა თავდაცვის სამინისტროში უკვე დაიწყო“, - განაცხადა ფედოროვმა.
მისი თქმით, მისთვის მნიშვნელობა არ აქვს არც თანამდებობას და არც სტატუსს - მთავარი ის არის, ჰქონდეს რეალური შესაძლებლობა, გავლენა მოახდინოს შედეგზე და ხელი შეუწყოს უკრაინის გამარჯვების მოახლოებას.
ფედოროვის თქმით, 2026 წლის იანვარში, პრეზიდენტ ვოლოდიმირ ზელენსკის მიწვევით, მისი გუნდი თავდაცვის სამინისტროში ომის დასრულების კონკრეტული გეგმით მივიდა.
„ჩვენ გვქონდა მკაფიო გეგმა - დაგვეცვა ცა, შეგვეჩერებინა ფრონტი და მიგვეყენებინა დარტყმა მტრის ეკონომიკისთვის. ამ გეგმას AIR–LAND–ECONOMY ვუწოდეთ“, - განაცხადა მან.
ფედოროვის თქმით, მომდევნო ექვსი თვის განმავლობაში მისი გუნდი ამ გეგმას თანმიმდევრულად ახორციელებდა.
„ბოლო წლების განმავლობაში პირველად, უკრაინამ ინიციატივის ხელში აღება დაიწყო. ჩვენმა ერთობლივმა შედეგებმა შექმნა ის, რაც აქამდე არ არსებობდა - შესაძლებლობის ფანჯარა, რათა რუსეთი ძალის გამოყენებით მშვიდობაზე წასულიყო“, - აღნიშნა თავდაცვისყოფილმა მინისტრმა.
მანამდე ვოლოდიმირ ზელენსკიმ განაცხადა, რომ ფედოროვს რამდენიმე თანამდებობა შესთავაზს, მათ შორის სამხედრო ინოვაციების საკითხებში ვიცე-პრემიერის პოსტი იყო.
